Аусмҩаԥгатә аиҿкаара рхахьы иргеит – Аԥсны атәылахьчара Аминистрра, абылтәы еилазаара «Аԥсны-Оил», иара убас акультуратә фонд «Платформа».

Ԥхынгәымза агәазы, Урыстәылатәи Афедерациа Приволжтәи Афедералтә округ  аҿы Ҳаҭыр зқәу Аԥсны Аконсул Владимир Литвинчук инапхгарала, акультуратә фонд «Платформа» аԥшьгаратә гәыԥ, Аԥсны атәылахьчара Аминистрра аруаа абаҟа аиҭашьқәыргылара хдыркәшеит. Абаҟа аартра ацеремониа ашьҭахь иаартхаз абаҟа амҵан иҭаҵәаххо, еиҵагыло абиԥарақәа рзы аԥсышәалеи аурыс бызшәалеи иҩу ацҳамҭа «аамҭа акапсула» аҵаҵара иадҳәалоу ацеремониа мҩаԥысит. Уи аартра азԥхьагәаҭоуп 2043 шықәсазы, Аџьынџьтәылатәи Еибашьра Дуӡӡа аҿы Аиааира агара Амш 100-шықәса ахыҵра аҽны.

Ҿыц еиҵагыло абиԥара рышҟа ацҳамҭа аҿы ахәҭакахьала иазгәаҭоуп: «Агәра ҳгар ҳҭахуп, Аџьынџьтәылатәи Еибашьра Дуӡӡа аҿы Аиааира агара Амш азгәаҭара аламҭалазы Клыхәратәи, Марыхәтәи, Санчартәи аҩхаақәа рҿы иҭахаз аибашьцәа зегьы рыԥсыбаҩ ԥшааны анышә ишамадахо».    

 Жьҭаарамза 9, 2023 шықәса рзы Аџьынџьтәылатәи еибашьра Дуӡӡа аан зегьы реиҳа ишьаарҵәыраз иуадаҩыз аидысларақәа иреиуоу, Кавказ ахьчара иазкны имҩаԥгаз аидыслара ду ҟалеижьҭеи  80 шықәса ахыҵра азгәарҭоит.  Ари адунеизегьтәи аҭоурых аҿы акыр зҵазкуа арыцхә ауп, избан акәзар усҟан   Кавказ ашьхеибаркыра Хада аԥснытәи аҵакыра аҿы анемец архәҭқәа аанкылахеит. Асовет архәҭақәа хацәнымырха инарыгӡаз аҽагылара иабзоураны, аӷа иаанкылареи, уимоу шьҭахьҟа ихьацареи аӷа игәҭакқәа рыԥхьырҟәҟәареи алыршахеит.    

Ԥхынгәымза 31, 2020 шықәса рзы Урыстәылатәи Афедерациа Ахада Владимир Путин «Урыстәыла агәалашәаратә мшқәеи арратә ахьӡ-аԥша амшқәеи рзы» Афедералтә закәан ахәҭаҷ  1 аиҭакрақәа ралагаларазы» Афедералтә закәан инапы аҵаиҩит.  Жьҭаарамза 9 асовет архәҭақәа рыла Кавказ ахақәиҭтәразы аидыслара (1943 шықәса) аҿы анемец-фашисттә архәҭақәа рықәхра Амш ҳәа иԥхьаӡоуп.   

Абри атәы аанацҳауеит акультуратә фонд «Платформа» апресс-маҵзура.