Аҟәа. Жьҭаарамза 9, 2023 шықәса. Аԥсныпресс. Акультура аминистр Даур Ақаҩба Ареспублика Аԥсны Аҳәынҭқарратә камертә оркестр адирижиор Хада, Аԥсны жәлар рартист Давид Терзиан 50-шықәсатәи ииубилеи инамаданы дидныҳәалеит.
Иара аиубилиар агәабзиареи арҿиаратә қәҿиарақәеи изеиӷьаишьеит.
«Шәара шәнапхгарала акамертә оркестр – Аԥсны агәадураны иҟалеит. Зыквалификациа ҳараку апрофессионалцәа аус ахьыруо, арепертуар ду змоу аоркестр, ари зегьы шәусура ламысцқьала азнеира иабзоурахеит», – ҳәа инаҵшьны иазгәеиҭеит Даур Ақаҩба.
Аминистр Аԥсны асимфониатә оркестр ду шеи-ҭарҿиахо, уи ареспублика ахьӡ шыҭнаго азы агәыӷра ааирԥшит.
Давид Терзиан аминистр адныҳәаларазы иҭабуп ҳәа еиҳәеит.
«Даара гәахәарыла исыдыскылоит адныҳәаларақәа. Уи анаҩстәи сусуразы, зегьы реиҳа асимфониатә оркестр аиҭарҿиара ауп агәазҭазаара сызҭо, иара ауп схықәкы хаданы иҟоу. Сара даара аҳәара ду ҟасҵоит ари азҵаара аӡбараҿы зегьы ҳамчи ҳахшыҩи еилаҳҵарц. Агәра шәсыргоит ҳҳәынҭқарра азы аоркестр акыр шаҵанакуа», – ҳәа иазгәеиҭеит Давид Терзиан.
Акультура аминистр еиҵагыло абиԥара аклассикатә музыка абзиабара рылаӡаара аҵакы ахадара азгәеиҭеит. Даур Ақаҩба иажәақәа рыла, ари аус аҿы жәҳәарада асимфониатә оркестр ароль ду нанагӡоит. Аиубилиар иара убас идныҳәалеит акультура аминистр ихаҭыԥуаҩ Динара Смыри А. Чичба ихьӡ зху Аҟәатәи амузыкатә ҵараиурҭа адиректори.
