Аҟәа. Жьҭаарамза 3, 2023 шықәса. Аԥсныпресс. Аԥсны Ахәаахәҭра-ааглыхратә Палата аҿы Апрезидент Ҭамила Мерцхәлааи Аԥсны Аҳәынҭқарра Ахьыԥшымра жәларбжьаратәи азхаҵара 15 шықәса ахыҵреи, Аиааиреи Ахьыԥшымреи 30 шықәса рхыҵреи иазкны аныҳәатә усмҩаԥгатәқәа рылахәхаразы зколлегацәа зыцны Аԥсныҟа иааз Афедеративтә Республика Германиа иҟоу Аԥсны Ахәаахәҭра-ааглыхратә Палата ахаҭарнак Вольфганг Мацкеи русуратә еиԥылара мҩаԥысит. Аиԥылара иара убас лхы алалырхәит Германиа иҟоу Аԥсны адәныҟатәи аусқәа Рминистрра аҷыдалкаатә зинмчы змоу ахаҭарнак Хьыбла Амҷба.
Аиԥылара аартуа, Аԥсны Ахәаахәҭра-ааглыхратә Палата апрезидент асасцәа Аԥсны ахь иаадырԥшуа аинтереси аԥсуа жәлар рзы аҵак ду змоу арыцхә иадҳәалоу ргәырӷьара рыцеиҩыршарц иахьааз иҭабуп ҳәа ралҳәеит.
Аиԥылараҿы ирылацәажәеит жәларбжьаратәи арена аҿы агеополитикатә ҭагылазаашьа аҽыԥсахра иадҳәалоу актуалра зҵоу азҵаарақәа жәпакы. Иалацәажәеит Германиа иҟоу Ахәаахәҭра-ааглыхратә Палата Ахаҭарнакра аусуреи уи ԥхьаҟатәи аперспективақәагьы.
Вольфганг Мацке Ахаҭарнакра аусура ацҵара шалыршахо азы еизаз агәра диргеит. Уи иара убас Аԥсны Ахәаахәҭра-ааглыхратә Палата анапхгараҭара Ахаҭарнакра ԥхьаҟатәи аусуразы агәҭакқәа ртәы рзеиҭеиҳәеит.
