Аҟәа. Цәыббрмза 22, 2023 шықәса. Аԥсныпресс. Ашәахьа, цәыббрамза 25, асааҭ 15:00 рзы, Очамчыра араион Аӡҩыбжьа ақыҭан ақыҭеи ақыҭанхамҩеи рыҿиара Ацентр ахәбатәи аексперименталтә плошьадка аатуеит, ҳәа Аԥсныпресс акорреспонднт адырра ирҭеит Еиду Амилаҭқәа Реиҿкаара аҿиара Апрограмма Аҟәатәи аофис аҿы.
Аплошьадка амратә панельқәа рыла еиқәыршәоуп, иара убри ала уи ауникалтә ҟазшьа аанахәоит. Ари – Аԥсны аиԥш-зеиԥшу уаҳа зда ыҟам плошьадкоуп.
Аҭыԥантәи арԥхарҭа аҿы голубика, амалина, акакан, алаҳа, аца, аурыс аца, уҳәа аҵиаақәа реиҭаҳатәқәа рааӡоит. Ашәыр хкқәа зегьы рыдгалара ақыҭеи ақыҭанхамҩеи рыҿиара Ацентр аспециалистцәа рыла имҩаԥгоуп. Урҭ Ҭырқәтәыла, Италиа, уҳәа егьырҭ атәылақәа рҟынтәи Аԥсныҟа иааган.
Аексперименталтә плошьадка аартраан Ацентр аспециалистцәа аексперименталтә плошьадка аартра аидеиа ацәырҵра шыҟалаз, аплошьадка ахықәкқәа, иаадрыхуа аҵиаа ахкқәа, иара убас аԥхьаҟатәи азԥхьагәаҭарақәеи ирылацәажәараны иҟоуп.
Ақыҭеи ақыҭанхамҩеи рыҿиара Ацентр аусура ақыҭақәа рҵакырақәа рыҿиара азы Европатәи атәылақәа Реидгылеи Еиду Амилаҭқәа Реиҿкаареи еицаԥшьаргаз апрограмма аҳәаақәа ирҭагӡаны инанагӡоит.
