Давид Цужба иажәақәа рыла, сынтәа имҩаԥгахо афестиваль адраматургиа аганахьала еиҳа еизакны иҟалоит. «Афестиваль асасцәа аҭаара аҟынтәи ироуа иреиӷьу ацәанырра акыр аамҭа ргәаҵаҿы ишаанхо азы агәыӷра ҳамоуп», ҳәа иазгәеиҭеит иара.

Москватәи Аԥсуа Диаспора анапхгараҭара алахәыла Инна Барчани апроект «Аетнопарк Аԥсны" акуратор Кристина Ҭыжәбеи афестиваль аҿы акинотеатри алекториеи рҿы аԥснытәи акинематограф  абареи амастер-классқәа рҭаареи аԥсуа бызшәа аурокқәа ргареи, уҳәа убас ирацәаны алшарақәа аԥҵахоит ҳәа иазгәарҭеит. «Асцена хада аҿы иқәгылоит амилаҭтә музыкатәи акәашаратәи аколлективқәа. Афестиваль аҭааҩцәа атрадициатә чара аҿы асас ироль анагӡара иҽазишәар ауеит, иара убас ажәытәтәи аԥсуа қьабзқәеи аҵасқәеи аҵара «Аамсҭа Қьиабз» рзы адырра иоур алшоит. Еиҳа активра злоу аԥсшьара абзиабаҩцәа аҟаза Заур Жане ицны кавказтәи аиога ала рҽазыҟарҵар ҟалоит, анардқәа, ашахматқәа рзы атурнир аҿы рымчқәа ԥыршәар, иара убас аԥсуа ахыци ахәымпали рыла ахысра рҵар алшоит.   Иара убас афестиваль апрограмма аҿы иҟоуп – ашәҟәытә маркет, аҳаԥшьаӡратә ҟазарҭеи ажьиреи, ҳаамҭазтәи аԥсуа сахьаҭыхыҩцәа рсахьақәа рцәыргақәҵа». 

Инна Барчан лажәақәа рыла, есышықәса афестиваль иаҭаауа рхыԥхьаӡара еиҳахоит.

«Ҳара аҭааҩцәа рхыԥхьаӡара ацлара ҳазыԥшуп. Афестиваль аҳәаақәа ирҭагӡаны еиҿкаахоит «Аиааиара Аллеиа». Араҟа иаарԥшхоит ҳажәлар Аиааираҟа инагаз амҩа аҿы изхысыз ихадоу ахҭысқәа. Иагьа  уадаҩреи, иагьа мыҟәмабареи рхыргазаргьы, ҳажәлар рзы ари ныҳәа дуӡӡоуп, ҳара ари агәалаҟазаара шьахә ҳфестиваль аҭааҩцәа рызнагара ҳҭахуп», - ҳәа илҳәеит лара.

Афестиваль арежиссиор  – Аԥсны зҽаԥсазтәыз артистка Мадина Аргәын. Аусмҩаԥгатә мҩаԥысуеит Аԥсны акультура Аминистрра адгыларала.