Аҟәа. Цәыббрамза 8, 2023 шықәса. Аԥсныпресс. Адунеизегьтәи аԥсуа-база жәлар Рконгресс Амедицинатә Центр «Альбамед» ацырхырааны амедицина-социалтә конференциа мҩаԥнагеит, ҳәа адырра ҟанаҵоит Адунеизегьтәи аԥсуа-база жәлар Рконгресс аофициалтә саит.
Аконференциа алахәылацәеи асасцәеи апсихикатәи ацәажәаратәи ҿиара аҿы еиҵахоу ахәыҷқәа рреабилитациатә потенциал иалацәажәеит.
Адунеизегьтәи аԥсуа-база жәлар Рконгресс аҭаацәаратә клуб апсихикатәи ацәажәаратәи ҿиара аҿы еиҵахоу ахәыҷқәа рреабилитациатә потенциали урҭ рсоциалтә адаптациеи рҵарадырреи иадҳәалоу азҵаарақәа рыла аиԥылара мҩаԥнагеит.
Аконференциа аҳақьымцәа-адефектологцәа, алогопедцәа, арҵаҩцәа, асоциалтә структурақәа рхаҭарнакцәеи аҭаацәеи еиднакылеит.
Аконференциа рхы аладырхәит: аҳақьым-неирофизиолог Алеқсандр Горелик, амедицинатә Центр «Альбамед» анапхгаҩы, аневролог Альбина Хоџьаа, адефектолог Елена Стогова, «МРТ-эксперт-Сочи» аҳақьым-рентгенолог Олег Тимонин, иара убас Аԥсны ахәыҷы изинқәа рыхьчаразы Азинмчы змоу Мактина Џьынџьал. Аиԥылара амодератор иаҳасабала дықәгылеит Адунеизегьтәи аԥсуа-база жәлар Рконгресс аҵарадырра, асоциалтә активреи агәабзиарахьчареи рыҟәша аиҳабы Изольда Ҳагба.
