Аганқәа аекономика, атуризм, аҵарадырра, аспорт, аҿартә политика, уҳәа аусхкқәа рҿы аусеицура аперспективақәа ирылацәажәеит. Иара убас аибашьратә хҭысқәа ирылахәыз рреабилитациа амҩаԥгара азҵаарақәа ирзааҭгылеит.
Аԥснытәи аделегациа иалахәыз азҿлымҳара аадырԥшит аиқәыршәазаара, атуризм аиҿкаара, амуниципалтә наплақәа рырҿиара, уҳәа ахырхарҭақәа рыла Калуга иамоу аԥышәа амдара. Алеқсандр Иванов ахәҭакахьала аԥснытәи амуниципалқәа рхаҭарнакцәа Урыстәылатәи Афедерациа ахаҭарнакратә усбарҭақәа Реидгыла Акоординациатә хеилак аусура алахәхара азы ааԥхьара риҭеит.
«Аԥсны Калуга ауааԥсыра рыбжьара акыр апопулиалра злоу аԥсшьараҭыԥны иҟоуп, аҵыхәтәантәи аамҭазы иумбар залшом ареспублика аҿы атуристтә инфраструктура хра злоу адинамика шыҟоу, иара убас ҳара ҳуааԥсыра иблахкыгоу Аԥсны аԥсабареи уи асасдкылара злоу ажәлари даара иргәаԥхоит. Ҳара Аԥсны атуризм аусхкы аҿы иамоу аԥышәа ҳазҿлымҳауп, Калугагьы есышықәса еиҳа-еиҳа атуристцәа радыԥхьалара мҩаԥнагоит. Убасҵәҟьа ҳара астудентцәа реимдара, аспорттәи аҿартәи аусмҩаԥгатәқәа реицымҩаԥгара, уҳәа аусхкқәа рҿы аусеицуразы хра злоу аперспективақәа ҳамоуп», - ҳәа иазгәеиҭеит Иури Моисеев.
