Заанаҵтәи аусеилыргарала ишышьақәыргылаз ала, мшаԥымза 5, 2023 шықәсазы, асааҭ 20:15 инарзынаԥшуа,  Саҭбеи Кәакәасқьыр,  зыхҭаларшә 9 мм. рҟынӡа инаӡо атапанча «Макаров» ала, макьаназы зхаҭара шьақәыргылам ахаҿи иареи заанаҵы ицәыҵеицәажәаны, Анқәаб Р.Ш. ила ажьырныҳәамза 1, 2012 шықәсазы Гәдоуҭа араион Дәрыԥшь ақыҭан Какәасқьыр Гииа Гәырам-иԥа ишьра инамаданы ашьаура гәҭакыс иҟаҵаны, Гагра араион Багрыԥсҭа ақыҭан иҟоу аҩнеихагыла №75/4 ашҭаҿы днеит. Анқәаб Раџьаб Шьоҭа-иԥа  адәахьы дандәылҵуа ҳәа дыԥшны даатәеит. Анқәаб Р.Шь. дандәылҵ, Кәакәасқьыр Саҭбеи уи хынтә диеихсит. Анқәаб Р.Шь. иоуз ахәрақәа ирыхҟьаны иара уааҵәҟьа иԥсҭазаара далҵит.  

Аԥсны Ашьаусеилыргаратә Закәанеидкыла ахәҭаҷ 99, ахәҭа  2 ала асанкциа  иарбоу ацәгьоуразы ахьырхәра аҳасабала иазԥхьагәанаҭоит аа-шықәса инаркны жәохә шықәса рҟынӡа аҭакрала ахгара, мамзаргьы ԥсраҽнынӡа аҭакра, мамзаргьы ашьра ақәҵара.