Аҟәа. Нанҳәамза 14, 2023 шықәса. Аԥсныпресс. Нанҳәамза 18 – 19 рзы Аҟәа ақалақь аҿы имҩаԥыслоит жәларбжьаратәи афорум “Аԥсны. Урыстәылатәи Афедерациа ала Аԥсны Ахьыԥшымра азхаҵара ҟалеижтҭеи 15 шықәса аҵра».
Афорум аиҿкаара рхахьы иргеит – Афонд «Акоммуникациақәа рыҿиара Жәларбжьаратәи аинститут АҬЫНЧРА– АЦҲА – АԤСНЫ», Иара убас Аԥснытәи аҳәынҭқарратә Университет.
Афорум аартра мҩаԥгахоит нанҳәамза 18 азы аминистрцәа Реилазаара аконференц-зал аҿы.
Афорум аҳәаақәа ирҭагӡаны атол гьежьқәа ҩба абарҭ атемақәа рыла амҩаԥгара азԥхьагәаҭоуп:
«Аԥсны – Урыстәыла 2070»,
«Урыстәылеи Аԥсни рыбжьара аинформациатә усеицура: апрактика, аԥышәа, аперспективақәа».
Аԥсны-урыстәылатәи аизыҟазаашьақәа еиуеиԥшым аспектқәеи урҭ рыҿиара аперспективақәеи ирызкхоит жәларбжьаратәи аимадарақәеи аекономикатә зҵаарақәеи рзы ААУ апроректор Максим Ӷәынџьиа, Акоммуниациақәа рыҿиаразы Амилаҭтә ҭҵаарадырратә Институт адиректор ихаҭыԥуаҩ, асоциологиатә наукақәа рдоктор Валентина Комлева, Урыстәыла иҟоу Аԥсны ахәаахәҭратә хаҭарнак Олег Барцыц, Жәларбжьаратәи аҭҵаарадыррақәа Ринститут иԥхьагылоу аусзуҩ, ажурнал «Международная аналитика» аредактор хада Сергеи Маркедонов, Урыстәылатәи Афедерациа Ахада иҟны иҟоу , аҳәынҭқарратә маҵзуреи жәлар рынхамҩеи рзы Урыстәылатәи Академиа (РАНХиГС) ауаажәларратә еимадарақәа Рцентр адиректор ихаҭыԥуаҩ Сергеи Шатунов, уҳәа егьырҭ рықәыгыларақәа.
Аԥснытәи аҳәынҭқарратә Университет аректор Алеко Гәарамиа иԥылара ашьҭахь ААУи Акоммуникациақәа рыҿиаразы Амилаҭтә ҭҵаарадырратә Институти (ақ. Москва). аусеицура рыбжьаҵаразы Аиқәшаҳаҭра анапаҵыҩра мҩаԥгахоит.
Аилацәажәара афилософиа аҟынтәи даара иуашәшәыроу, ирласны зҽеиҭазкуа адунеи аҿы абиԥарақәа рзеиԥш шьаҭа ашьақәыргылареи ахәдуқәа рыиагара апрактика афиласофиа ахь аиасра шԥалыршатәу – ари PR, GR рзы аполитикатә абжьгаҩ, апсихолог, аексперт Алиона Августи Аԥснытәи аҳәынҭқарратә Унивеситет ахаҭарнакцәеи амассатә информациа ахархәагақәеи апресс маҵзурақәеи русзуҩцәеи реиԥылара атема хада ауп.
Амассатә информациа ахархәагақәеи апресс маҵзурақәеи русзуҩцәа рзы амастер-класс мҩаԥигоит Урыстәылатәи Афедерациа Ахада иҟны иҟоу аҳәынҭқарратә маҵзуреи жәлар рынхамҩеи рзы Урыстәылатәи Академиа (РАНХиГС) ауаажәларратә еимадарақәа Рцентр адиректор ихаҭыԥуаҩ, PR аусхкы аҿы аспециалист, аексперт, ажурналист, Қырҭтәылеи Аԥсни рыбжьара бџьаршьҭыхлатәи аиҿагылара алагара иазкны раԥхьаӡатәи арепортажқәа равтор Сергеи Шатунов.
Иара убас иазԥхьагәаҭоуп ажурнал «Иҿыцу аус знапы алаку ауаа» аӡыргара.
Афорум апартниорцәа – Аԥсны Аҳәынҭқарра атәылахьчара Аминистрра, Акоммуникациақәа рыҿиаразы Амилаҭтә ҭҵаарадырратә Институт (Москва), Асоциалтә программақәа адгылара рыҭаразы Амилаҭтә Фонд (НФСП), Аԥсны ажурналистцәа Реидгыла, амедиа-агентра «Sputnik Аԥсны».
