Иҳаҩсыз ашықәс азы ахашәалахәқәа аныхтәқәа раасҭа 65 млн. 836 нызықь мааҭ рыла еиҳахеит.
Абиуџьети ашәахтәқәеи афинансқәеи аекономикеи азԥхьагәаҭареи рзы есымша аус зуа адепутаттә Комиссиа ахантәаҩы Давид Чхьеиӡе иажәақәа рыла, абиуџьет ахашәалахәытә хәҭа аизырҳара иабзоураны аҳҭнықалақь аҿы ауаа рыԥсҭазаара аиӷьтәра иазырхаз апроектқәа маҷымкәа рынагӡара алыршахеит.
«Акомиссиа ахьӡалеи хаҭала сара сыхьӡалеи ақалақь Ахадара иҳаднагалаз 2022 шықәсазы абиуџьет анагӡаразы аҳасабырба ашьақәырӷәӷәаразы абжьгара ҟасҵоит», - ҳәа иҳәеит Давид Чхьеиӡе.
Аилатәара иалахәыз 12-ҩык адепутатцәа рҟынтәи 11-ҩык аҳасабырба ашьақәырӷәӷәаразы рыбжьы рҭиит.
