Аслан Бжьаниа ҿырԥштәыс иааигеит ааигәа, рашәарамза анҵәамҭа инаркны Шәачеи Аҟәеи ирыбжьалаз акруизтә ӷба «Князь Владимир».
«Ҳара ишахәҭоу ала алаинер «Князь Владимир» адкылара ҳалшазар, алаинер Astoria Grande убасҵәҟьа аҭыԥ азаҳаԥшааратәы ҳаҟоуп», - ҳәа иазгәеиҭеит Аслан Бжьаниа.
Акруизтә лаинер Баҭымҟа инеит ашәахьа ашырԥазы. Уи аԥхьа ахәылбыҽха инаркны уаҟа еизо иалагахьан аоппозициатә партиақәа рхаҭарнакцәа, урҭ ари алаинер иҭоу рхыԥхьаӡараҿы Украина имҩаԥысуа аибашьратә хҭысқәеи, иара убас Аԥсны ахьыԥшымреи ирыдгыло ауаа ыҟоуп ҳәа аҳәамҭақәа ҟарҵон. Еизаз ауааи аполициеи ана-ара уажәы-уажәы реидысларақәа ҟалон. Аполициа аусзуҩцәа иааныркылеит 23 –ҩык ауаа. Аӷба Astoria Grande ашәахьа ауха Баҭымтәи амшынтә баӷәаза ааныжьны шьҭахьҟа амҩа иқәлеит. Уи ашьҭахь амитингқәагьы аанкылеит.
