Аҟәа. Ԥхынгәымза 27, 2023 шықәса. Аԥсныпресс. Аҳәынҭқарра Ахада Аслан Бжьаниа Аҟәа ақалақь аҿы имҩаԥигоз аинспекциатә гәаҭара аҳәаақәа ирҭагӡаны Аҟәатәи ашьха аҿы аԥшырҭатә плошьадкеи ацҳа Ҟаԥшьи рҿы аиҭашьақәыргыларатә усурақәа рымҩаԥысшьа гәеиҭеит.
Аҟәа ақалақь ахада Беслан Ешба Аҳәынҭқарра Ахада иарбоу аобиектқәа рҿы иҩаԥысуа аусурақәа зегьы цәыббрамза 30 – Аԥсны жәлар Рџьынџьтәылатәи еибашьра аҿы Аиааира агара Амш 30 - шықәса ахыҵра аҟынӡа ишхыркәшахо азы адырра ииҭеит.
Аҳҭнықалақь ахада ацҳа Ҟаԥшь ақалақь аҿы асимволра зҵоу ҭыԥны иҟоуп ҳәа иазгәеиҭеит.
«Ари аҭыԥ аҿы ҳаибашьцәа гәымшәақәа раԥхьаӡа аӷа иҿагыланы аидыслара мҩаԥыргеит. Уи аҭоурых-культуратә ҭынханы иҟоуп. Аҳҭнықалақь Ахадара Аиааира 30-шықәса ахыҵра амш аламҭалазы ацҳа Ҟаԥшь аиҭашьақәыргылара азы аӡбамҭа аднакылеит. Аиҭашьақәыргыларатә усурақәа мҩаԥнагоит ақалақь Ахадара», – ҳәа иҳәеит Беслан Ешба.
