«Азарал ашәагаа аилкаара хыркәшоуп, акомиссиа алахәылацәа ааха зуз аҩнқәа зегьы ирҭааны актқәа еиқәдыршәеит. Уажәы акомисиа аусура ааха зауз ауаа категориала реихшара иадҳәалоуп. Актәи акатегориа иалалоит зегьы реиҳа азарал зауз ауааԥсыра. Ҳара ҳхықәкы – зегьы раԥхьаӡа иргыланы хыҵакырҭада иаанхаз аҭаацәа ацхыраара рыҭара. Иара убас зматериалтә ҭагылазаашьа уадаҩууи ахәыҷырацәа змоу аҭаацәеи адгылара рыҭара. Арҭ афакторқәа зегьы ааха зауз рҟынтәи арзаҳалқәа  рыхәаԥшраан ҷыдала ҳасаб азухоит», – ҳәа илҳәеит лара.

Акомиссиа ахь инарышьҭхьеит 400 инареиҳаны арзаҳалқәа.  

Гагра ақалақь аҿы арлахҿыхратә обиектқәа ракәзар, урҭ зегьы абжьааԥнытәи арежим ала аус руеит. Изеиԥшразаалак агәынамӡара ҳәа атуристцәа рҟынтәи араион Ахадарахь имнеиӡацт.

Хана Гәынба иара убас аӡрыжәтә ахаҭабзиареи амшынӡы ацқьареи рызҵаара дазааҭгылеит. Урҭ рхаҭабзиара иҟоу анормақәа ирықәшәоит ҳәа иазгәалҭеит лара.  

Ԥхынгәымза 8 – 9 ауха Гагра араион аҿы ақәаршҩы ӷәӷәа ауит. Зқьыла аҩнқәа аӡы рыҵалеит, амҩақәа бгеит, аихамҩа ахәҭак ыҵнаӡәӡәааит, 100 инарзынаԥшуа атуристцәа раанкыларазы аобиектқәа ааха роуит.  

Ԥхынгәымза 11 рзы Аҳәынҭқарра Ахада иҭижьыз Аусԥҟа ала иаԥҵан аԥсабаратә рыцҳара ахҟьаԥҟьақәа рықәгаразы ареспубликатә штаб.  Уи аҭыԥантәи ахадарақәеи аҳәынҭқарратә маҵзурақәеи русура ахылаԥшра анаҭон.

Ԥхынгәымза 17 рзы иаартын Гагра ақалақь аҿы иҟалаз аԥсабаратә рыцҳара иахҟьаны ааха зауз ауаа рзы агуманитартә цхырара адкыларазы апункт.