Атәыла Анапхгара ахада агәра ганы дыҟоуп апарт отельқәа рыргылара аҿагылара амыцхәрас  COVID еиԥш иҟоу аҿкы чымазарақәа роуп изыцәшәатәу.

«Абар иааҳгозар COVID ахҟьаԥҟьақәа  ирыдҳәалоу  ацифрақәа. 2020 шықәсазы иит  955-ҩык аԥсуаа, 2021 шықәсазы ииз аԥсуаа рхыԥхьаӡара  100-ҩык рыла еиҵахеит.  2022 шықәсазы аԥсуаа рхыԥхьаӡара даҽа 200-ҩык рыла еиҵахеит. Абри ауп агәҭынчымра узцәырызгаша, абраҟоуп ҵабыргны  адемографиа азы ашәарҭара дуӡӡа ахьыҟоу», - ҳәа иҳәеит Алеқсандр  Анқәаб.

Уи иажәақәа рыла, ас еиԥш иҟоу ачымазарақәа, ачымазара ӷәӷәала ирылаҽаанӡа раарԥшра азҵаара, амедицина аҩаӡара ашьҭыхра, иара убас амҩақәа рҿы лассы-ласы иҟало авариақәа, анаркотикқәа,- абри ауп адемографиа азы ишәарҭара дуӡӡаны иҟоу.

«Амҩатә машәырқәа ирыхҟьаны иҭахо рҟынтәи 90 процент – аԥсыуаауп. Абри ауп ашәарҭара дуӡӡа. Абраҟоуп аполемика ӷәӷәа ахьаҭаху. Еилкаатәуп амҩатә машәырқәа рҿы, ачымазарақәа ирыхҟьаны аԥсуаа рҭахара аанкыларазы  иҟаҵатәу. Ари аполемика адгылара аҭара ахәҭаны иҟоуп. Егьи зегьы – аекономика акәша-мыкәша «аполитика» ҳәа изышьҭоу ахәша ала еиҵарԥхьоу абжьахәаахәҭратә  цәажәарақәа роуп.  Уи атезис абас иҟоуп: «Ҳара урҭ уи аҟаҵара раҳҭаӡом, ҳара иааулакгьы амчра ҳнапахьы иааҳгоит, анаҩс уи ҳхала еиҿаҳкаауеит», – ҳәа иазгәеиҭеит Алеқсандр Анқәаб.