Аҟәа хәыҷ аӡиас, иара убас Гарикәара ауп маҷк ихыҵыз, урҭ рыӡқәа абӷанҷ аманы  амҩақәа  ирықәлеит. Аҟәа хәыҷ аӡиас аӡышьҭра зшәаҳаз ихжәаз аҵла амахәқәеи ақдоухәқәеи Лакоба амҩахысырҭа иҿықәнагалеит. Уи азы ауп аӡгьы зхыҵыз.

«Аҟәа хәыҷ аӡиас зхыҵуа уи аӡышьҭра ахьрыцқьам азы акәӡам, уи злаауа аҭҳәаа акыр иахьыҭшәоу азы ауп изыхҟьо», - ҳәа иҳәеит Руслан Аҩӡба.

Аԥснытәи адраматә театр Пушкин имҩа аганахьала амаҵзуратә хыбра  ахәҭак аӡы ыҵалеит. Синоп аҳабла Услар имҩа аҿы  ҵлак каҳаит.

Руслан Аҩӡба иҟаиҵаз адыррақәа рыла, аҳҭнықалақь Ахадара анхара-коммуналтә Нхамҩа Адепартамент аҿы иаха инаркны «еиԥырҟьам аимадара ацәаҳәа» («горячая линия») аартуп.

«Аӡы аӡәы иҩны иҩналаны иҟам, аӡәы ацхыраара дамыҳәаӡацт. Ҳара ҳусзуҩцәа аҭел ала адыррақәа рыдыркылоит, макьаназы иҷыдоу ахҭыс ҟалеит ҳәа аӡәгьы дамысӡацт», –  ҳәа иҳәеит иара.         

Абри азы адырра ҟанаҵоит Аҟәа ақалақь Ахадара апресс-маҵзура.