Саид Саманба ишазгәеиҭаз ала, Кәыдры аӡиас ахыҵра иахҟьаны ааигәа иҟаз ақыҭақәа аӡы рыҵалон, уи аҭыԥантәи ауааԥсыра ӷәӷәала азарал рынаҭон.
Аӡҩыбжьа ақыҭа ахада Дмитри Абыхәба, амшцәгьақәа раан Кәыдры аӡиас анхыҵуа, уи Аӡҩыбжьа ақыҭауаа рнаҩс Уарчеи Кациқыҭи рҿы инхо ауааԥсырагьы азарал рнаҭоит ҳәа иазгәеиҭеит.
«Ҳара Аҳәынҭқарра Ахадеи атәыла аԥыза-министри рахь аҳәара ҟаҳҵеит ари азҵаара аӡбараҿы ацхыраара ҳарҭарц азы. Аекологцәа ракәзар, урҭгьы азԥхьанҵақәа ҟарҵеит. Анаҩс аӡиас аӡышьҭрарҽеиратә усурақәа хацыркхеит», - ҳәа адырра ҟаиҵеит Дмитри Абыхәба.
Уи иажәақәа рыла, аусурақәа еиҳа игәҩанны иалагазҭгьы, аҭагылазаашьа еиҳагьы иуадаҩхар алшон.
«Мҽхакы ҭбаала аусурақәа мҩаԥысуеит. Ҳара агәра ганы ҳаҟоуп ари апроблема шыӡбахо», -ҳәа иҳәеит иара. Зҭакԥхықәра Ҳәаақәҵоу Аилазаара «Неруд-Инвест» аԥҵаҩы Бенур Қриа ишазгәеиҭаз ала, ари аобиект хаҭала даҭаахьан Аҳәынҭқарра Ахада Аслан Бжьаниа. Уи имҩаԥысуа аусурақәа рцашьа иблала ибеит. Бенур Қриа ас еиԥш аусурақәа алшықәсанык имҩаԥысуазар ахәҭоуп ҳәа иазгәеиҭеит. Ари аҩыза амҽхак змоу аусурақәа Кәыдры аӡиас аҿы 30 шықәса раахыс аӡәгьы имҩаԥиимгаӡацызт.
