«Ҩбаны иҟоу атәылауаҩра аинститут Аԥсны Аҳәынҭқарра атәылауаа рзы акырӡа аҵак ду шаҵоу хымԥада иазгәаҭатәуп. Аиашазы, уи аиҭанеиааира акыр иармариоит, асоциалтә гарантиақәеи ашәарҭадареи шьақәнаргылоит», - ҳәа иазгәеиҭеит Лаша Аҩӡба.
Иарбоу аусшәҟәы, ганк атәылауаа ирымоу атәылауаҩра мап ацәкрада егьи аган атәылауаҩра адкылара азԥхьагәанаҭоит.
«Аҩҳәынҭқаррак ртәылауаҩра змоу Аԥсны атәылауаа Урыстәылатәи Афедерациа иахьаҵанакуа асоциалтә еиқәыршәара, аҵарадырра, амедицинатә цхыраара аиуразы, иара убас урҭ Урыстәыла анҭыҵ, ааигәатәи еиԥш харатәи аҳәаанырцәтәи атәылақәа рахь ацара азы азинқәа рымоуп», - ҳәа иазгәеиҭеит Лаша Аҩӡба.
Урыстәыла атәылауаҩра аиуразы арзаҳалқәа рыдкылара апроцедура алагара азы Аԥсны атәылауаа заанаҵы адырра рыҭахоит.
