Амузыкатә хәылԥазы рықәгыларала идырԥшӡеит ашәаҳәаҩцәа  Кристина Ешбеи Нана Черқьезиеи, урҭ Вивальди, Штраус, Масне, Маскани, Ана рырҿиамҭақәа рыла еиуеиԥшым ариақәа нарыгӡеит, рықәгылараҿы зеиӷьаҟам ала зыҩаӡара ҳараку авокалтә ҟазареи игәыҟаҵагоу  пианиссимои аадырԥшит.  Иара убас Акамертә оркестр арфахәмарҩы, иҵаулоу, иԥшӡоу сопрано змоу Елена Ҳагба Шуберт еицырдыруа икомпозициа «Ave Maria» нылыгӡеит.  

Москватәи аконсерваториа аҩбатәи акурс астудентка Лана Адлеиба авокалистцәеи аскрипкарҳәаҩцәа рыцырҳәара адагьы, аопера «Трубадур» аҟынтәи Верди-Лист иконцерттә парафраз зеиӷьаҟам ала иналыгӡеит.  

Алеқсандр Аҩӡбеи Светлана Сариани инарыгӡаз  ҳаамҭазтәи италиатәи акомпозитор Роберто ди Марино ирҿиамҭа  «Chronos» даара игәыҟаҵагаха азыӡырҩцәа ргәаҵанӡа инаӡеит.  Ари амузыка абжьы атемпераменттә, еилыкка иҟоу, зыԥхарала аӡы рԥханы ахылҩа-ԥсылҩахара алзыршо амра ашәахәақәа зылԥхаауа ацәықәбарқәа реиԥш узыршанхо аҟазшьа амоуп.  

Ахәылԥаз ахыркәшамҭаз Виктор Абрамиан-Ешба виртуозла инаигӡеит Едвард Елгар ирҿиамҭа шьахә «Привет любви»,  иара убас  Брамс ирҿимҭа «Венгерский танец».

Аконцерт ашьҭахь Аԥсны акультура аминистр ихаҭыԥуаҩ  Динара Смыр, Виктор Абрамиан-Ешба «Аԥсны Аҳәынҭқарра зҽаԥсазтәыз артист» ҳәа аҳаҭыртә хьӡы ианашьаразы Аҳәынҭқарра Ахада Аслан Бжьаниа иҭижьыз Аусԥҟа атекст даԥхьеит.  

Угәы иаамыхәар залшомызт азал аҿы хыԥхьаӡара рацәала атуристцәа ахьыҟаз. Урҭ рзы Аԥсны акультура аганахьалагьы иаатит.