Аусмҩаԥгатә ахыркәшамҭаз Беслан Карчааи Аслан Ҭырқьбеи Урыстәылазегьтәи анапылампыл Афедерациа анапхгаҩцәа рзы агәаларшәагатә ҳамҭақәа рырҭеит.
Урыстәыла анапылампыл 100-шықәса ахыҵра инамаданы, Урыстәылазегьтәи анапылампыл Афедерациа Анаԥшратә хеилак ахантәаҩы Николаи Патрушев изы Аԥсны анапылампыл Афедерациа Ахылаԥшратә хеилак ахантәаҩы Баҭал Тапаӷәуа иҟынтәи адныҳәаларатә шәҟәы дәықәҵан.
Беслан Карчаа, Афедерациақәа рыбжьара аусеицура абжьаҵаразы Амеморандум анапаҵыҩра – аԥснытәи аспорт азы акыр зҵазкуа хҭысны иҟалеит ҳәа иазгәеиҭеит.
«Агәра ганы сыҟоуп, аусшәҟәы анапаҵыҩра Афедерациақәа рыбжьара аусеицура арӷәӷәареи Аԥсны анапылампыл аҿиареи ишацхраауа. Ҳақәгәыӷуеит, хара имгакәа егьырҭ Афедерациақәагьы рыбжьара аусеицуразы Аиқәшаҳаҭрақәа рнапаҵыҩра шалыршахо. Уаҵәы иазԥхьагәаҭоуп Аԥсны анапылампыл Афедерациа ахаҭарнакцәеи Урыстәылазегьтәи анапылампыл Афедерациа анапхгара ахаҭарнакцәеи русуратә еиԥылара. Уаҟа еиҳа инҭкааны ирылацәжәахоаит аусеицуразы ашьаҿақәа», – ҳәа иҳәеит Беслан Карчаа.
