Зҭакԥхықәра Ҳәаақәҵоу Аилазаара «Карта» аҭыԥқәа зегьы деталла еилыкка иузырбо иҷыдоу аппаратура аанахәеит, анаҩс аҳҭнықалақь амҩақәеи аобиектқәеи ахатәы ҩнқәеи аҩнеихагылақәеи ааглыхратәии анхамҩатәии аргыламҭақәеи зегьи архитектура абаҟақәеи рортофотоҭыхра мҩаԥнагеит. Агеодырраҭаратә хсаалага иарбоуп афымцаҳақәа, акоммуникациақәа, аҿышәҭахҩақәа, аӡымҩангара шәырақәеи ацрыӡмҩангагақәеи рдиаметри рыҵазаара аҵаулареи. Иара убас, иарбоу ахсаалага ақалақь аҿы ишьақәыргылоу авидеокамерақәа ирыдҳәалоуп.
Иарбоу аетап аҟны, Ахра Бжьаниа иажәақәа рыла, ақалақь Атехникатә Инвентаризациа Абиуро аҟны, иара убас агеологиеи агеодезиеи акартографиеи рзы Аусбарҭа аҟны иҟаз апланшетқәа рҟынтәи аинформациа ахсаалага иалагалоуп, ҳаԥхьаҟа иҿыцу аобиектқәа рцәырҵреи акоммуникациақәа рырҿыцреи инамаданы ацҵақәа напыла алагалара ҟалоит.
Аҟәа ақалақь ахада Беслан Ешба аилазаара «Карта» адиректор хада имҩаԥгоу аусуразы иҭабуп ҳәа еиҳәеит.
Ахра Бжьаниа ақалақь Ахадара аусзуҩцәа рзы Аҟәа ацифратә хсаалага ахархәара, ирҭаху аинформациа аԥшаара, иара убас иҿыцу аинформациа алагалара дырҵара иазкны аҵаратә курс мҩаԥигараны дыҟоуп. Иара адыррақәа аусуратә компиутерқәа зегьы рахь апрограмма алагалара амыцхәрас азеиԥш сервер аҟны реизакра азы абжьгара ҟаиҵеит. Ахра Бжьаниа иара убас ахсаалага астационартә компиутер аҿы еиԥш аперсоналтә планшетқәа рылагьы ахархәара ҟалоит ҳәа алкаа ҟаиҵеит.
