Аҟәа. Рашәарамза 10, 2023 шықәса. Аԥсныпресс. Аԥсны адәныҟатәи аусқәа Рминистрра аусзуҩцәа лаҵарамза 29 инаркны рашәарамза 9 аҟынӡа Урыстәылатәи Афедерациа адәныҟатәи аусқәа Рминистрра Адипломатиатә Академиа жәларбжьаратәи аизыҟазаашьақәа русхкы аҿы азанааҭдырратә аиҭазыҟаҵара Аусбарҭа аҟны азанааҭдырра аҩаӡара ашьҭыхра акурсқәа ирхысуан.
Акурсқәа рымҩаԥгара аҳәаақәа ирҭагӡаны, Аԥсны адәныҟатәи аусқәа Рминистрра аусзуҩцәа Урыстәыла адәныҟатәи аусқәа Рминистрра аҟны иҟоу Ихьыԥшым аҳәынҭқаррақәа Реиҩызара атәылақәа Аԥшьбатәи Рдепартамент Аԥсни Аахыҵ Уаԥстәылеи рыҟәша аиҳабы Рубен Малаиан иԥылеит. Аиԥылараҿы Аԥсны-урыстәылатәи аусеицура иадҳәалоу азҵаарақәа рзы ргәаанагарақәа еибырҳәеит.
Аԥсны адәныҟатәи аусқәа Рминистрра ахаҭарнакцәа иара убас Урыстәылатәи Афедерациа иҟоу Донецктәи Жәлартә Республика ацҳаражәҳәаҩ Ольга Макеева илԥылеит. Аиԥылара аҿы Урыстәыла Украина имҩаԥнаго иҷыдоу арратә операциа иалацәажәеит.
Аԥснытәи аделегациа убасҵәҟьа афотоцәыргақәҵа "Урыстәыла Фидель Кастро иблақәа рыла» иаҭааит. Уи иара убас ихы алаирхәит Урыстәылатәи Афедерациа иҟоу Куба ацҳаражәҳәаҩ Хулио Антонио Гармендиа Пениа.
Аԥсны адәныҟатәи аусқәа Рминистрра аусзуҩ Сариа Џьопуа кубатәи адипломат изеиҭалҳәеит Фидель Кастро 1963 шықәсазы Аԥсны иҭаара атәы. Уи хара имгакәа Куба Аԥсны ахьыԥшымра шазханаҵо азы агәыӷра шлымоу лҳәеит.
