Аҟәа. Рашәарамза 9, 2023 шықәса. Аԥсныпресс. Атәыла аҩныҵҟатәи аусқәа Рминистрра анаркотикқәа реикәыршара аҿагылара азы Аусбарҭа аусзуҩцәа дааныркылеит Аҟәа ақалақь аҿы изакәанымкәа анаркотикатә маҭәашьарқәа реиҭарсра азы игәҩароу Краснодар атәылаҿацә атәылауаҩ.
1998 шықәсазы ииз Сергеи Суриадныи, амилициа аусзуҩцәа данааркылоз аамҭазы идырбалеит иагьимырхит еиқәыҭханы ирхиоу аилаҳәарақәа.
60 цыра рҟынӡа инаӡо аилаҳәара ирылаҳәан иҿыпуа амаҭәашьар. Уи аҭҵаара-гәаҭарахь идәықәҵахеит. Аҩныҵҟатәи аусқәа Рминистрра аексперт-криминалистә Центр аспециалистцәа Сергеи Суриадныи имырхыз амаҭәашьар анаркотиатә маҭәашьар «метадон» ауп ҳәа ишьақәдырӷәӷәеит.
Иаанкылаз игәаҭараан иара убас идырбалеит амобилтә ҭелқәа ҩба, абанктә картақәа, ихьӡи ижәлеи зырҵабыргуаз аусшәҟәқәеи.
Иаанкылаз иганахьала имҩаԥгаз аоператив-ԥшааратә усмҩаԥгатәқәа рыла Атәыла аҩныҵҟатәи аусқәа Рминистрра анаркотикқәа реикәыршара аҿагылара азы Аусбарҭа аусзуҩцәа Сергеи Суриадныи анаркотикатә канал «Леила» ала ззин ыҟам арҩышьыгатә маҭәашьарқәа реиҭарсра шымҩаԥигоз, насгьы уи аԥаратә хархәагақәа шаҭнихыз шьақәдыргылеит.
Амилициа аусзуҩцәа рыла иара убас Синоптәи аԥшаҳәа иахьаҵанакуа уаанӡа Сергеи Суриадин иҟаҵахьаз, аҭиразы еиқәыҭханы ирхиаз, ишкәакәоу иҿыпуа амаҭәашьар аилаҳәарақәа ԥшьба зҭаз имаӡоу аҭаҵәахҭыԥқәа рыԥшааит.
Сергеи Суриадныи иганахьала ҷыдала зыкапан рацәоу анаркотикатә маҭәашьар «метадон» анаҩс имаӡоу аҭыԥқәа рҿы рҭаҵәахрала аҭира хықәкыс иҟаҵаны изакәанымкәа аахәареи аҵәахреи рзы аусеилыргара хацыркуп. ахара идҵан.
