«Ҳара агәыҳалалратә фондқәа рхылаԥшра аҵаҟа иҟоу ахәыҷқәа апрактикатә цхыраара рыҭаразы ахәыҷтәы психиатрцәа Аԥсныҟа иаашьҭызарц азы аҳәара ҟаҳҵеит. Ари азҵаараҿы ҳара агәабзиарахьчара Аминистрра адгылара ҳҭахуп, усҟан ҳара акциа аицымҩаԥгаразы алшара ҳауоит», - ҳәа илҳәеит Мактина Џьынџьал.
Едуард Быҭәба Аминистрра аҿы ахәыҷқәа амедицинатә цхыраара рыҭара аусура ахырхарҭа хаданы иҟоуп ҳәа инаҵшьны иазгәеиҭеит. Иарбоу азҵаараҿгьы Аминистрра ацхыраара аҟаҵара иазхиоуп.
Мактина Џьынџьал урыстәылатәи аспециалистцәа раара ҳазҭоу амыз азы иазԥхьагәаҭоуп ҳәа адырра ҟалҵеит.
Едуард Быҭәбеи Мактина Џьынџьали иара убас афонд «Ашана» ахылаԥшра аҵаҟа иҟоу, ӷәӷәала ичмазаҩу ахәыҷы ацхыраара иҭара азҵаарагьы иалацәажәеит.
