Аҟәа. Рашәарамза 3, 2023 шықәса. Аԥсныпресс. Рашәарамза 3 рзы Аҟәа ақалақь аҿы Аԥсны амҵәышәмпыл азы Афедерациеи Аԥсны иҟоу Урыстәыла аус ацура Ахаҭарнакреи амобилтә еимадара «А-Мобаил», иара убас аҿари аспорти русқәа рзы Аусбарҭеи рыцхыраарала, Жәларбжьаратәи ахәыҷқәа рыхьчара Амш инамаданы, ашколхәыҷқәа рыбжьара 3×3 амҵәышәмпыл азы II Афестиваль мҩаԥысит. Абри азы адырра ҟанаҵоит Аԥсны иҟоу Урыстәыла аус ацура Ахаҭарнакра.
Мышкы имҩаԥысуаз аспорттә еицлабра рхы аладырхәит Аԥсны еиуеиԥшым араионқәа рҟынтәи 24 командак. Иаабац амҵәышәмпыла иаҿырԥшны уахәаԥшуазар, атурнир 3х3 аҿы мҵәышәк ауп иҟоу, убри аан аплошьадка иқәу ахәмарҩцәа рхыԥхьаӡара командак аҟынтәи хҩык рҟынӡа инаӡоит.
Аматч аҿы аиааира згаз ҳәа иԥхьаӡахоит зегьы раԥхьа 21 кәаҭала, мамзаргьы ахәмарра жәа-минуҭк рыла зегьы раасҭа акәаҭалақәа зырҳауа амҵәышәмпыласыҩцәа.
Аиндаҭлара ӷәӷәа аҿы афестиваль ахьтәы аԥхьахәқәа ргареи Аԥсны иҟоу Урыстәыла аус ацура Ахаҭарнакра аҟынтәи еиуеиԥшым урыстәылазегьтәи аспорттә еицлабрақәеи акультура-ҵарадырратә программақәеи рылахәхара азы алшара аиуразы еицлабуан 100-ҩык инареиҳаны амҵәышәмпыласыҩцәа.
«Ари афестиваль ҵыԥх еиԥш сынтәагьы амҽхак ҭбааны имҩаԥысит. Ҳара даараӡа ҳаигәырӷьоит ахәыҷқәа ибзиаӡаны иахьыхәмаруаз. Аиаша сҳәар еиӷьуп, ас еиԥш аспортсмен қәыԥшцәа рҟынтәи ари аҩыза апрофесионалтә хәмарра сазыԥшӡамызт иахьа. Уи ҵабыргыҵәҟьаны, уагәылазхалоз атурнир акәхеит. Аԥсны амҵәышәмпыл азы Афедерациа ахьӡала Аԥсны иҟоу Урыстәыла аус ацура Ахаҭарнакра анапхгаҩы Дмитри Федотови амобилтә еимадара Аилахәыра «А-мобаил» анапхгаҩы хада Бориса Барцыци аспорт аҿиара иазкны имҩаԥырго аусуреи ҳҿар Рыԥсадгьыл ахьӡала еиуеиԥшым аспорттә плошьадка дуқәа рҿы ақәгыларазы ирырҭо алшареи рзы иҭабуп ҳәа расҳәар сҭахуп», – ҳәа иазгәеиҭеит Афедерациа апрезидент Ераст Агәмаа.
Амш зегьы иалагӡаны аицлабрақәа ирылахәыз ахьтәы храҿақәеи амедалқәеи рзы еиндаҭлон. Иазгәаҭатәуп, араҟа апрофессионалтә мҵәышәпыл аҿы еиԥшҵәҟьа ӷәӷәала аибарххара аныԥшуан. Аспортсмен ҿарацәа рфиналтә матчқәа ирыхәаԥшуан хыԥхьаӡара рацәала аспорт абзиабаҩцәа, урҭ рыбжьы рдуны доусы изыдгылоз акомандақәа адгылара рырҭон, ргәы дырхаҵон.
Афестиваль аӡбаҩ хада, амҵәышәмпыл азы аспорт азҟаза Николаи Гушьин, атурнир алахәылацәа разыҟаҵара атехникатә ҩаӡара ацклаԥшра даара гәахәара дуун ҳәа иазгәеиҭеит.
«Иахьа ҳара зеиӷьаҟам аемоциатә ҟазшьа змоу ахәмарра ҳахәаԥшуан. Иубаратәы иҟоуп ахәыҷқәа рыҽшазыҟарҵо, профессионалла ессаира рыҩаӡра шышьҭырхуа, аспорттә гәыцә бзиа шрымоу. Амҵәышәмпыла 3х3 сара сгәаанагарала, еиҳа иперспективу, аинтерес зҵоу, адемократиатә ҟазшьа змоу аспорт хкқәа иреиуоуп. Уи хымԥада Аԥсны аҿиара аиуроуп. Ахәыҷқәа рхықәкынагӡара даҽазныкгьы иарҵабыргуеит аспорттә ԥеиԥш бзиа шҳамоу! Ҳара ҳаспортсменцәа идуу аренақәа рҿы ибзиоу, зыҩаӡара ҳараку амҵәышәмпыл аарԥшра шрылшо агәра ганы сыҟоуп», – ҳәа инаҵшьны иазгәеиҭеит атурнир аӡбаҩ хада.
Амҵәышәмпыл азы афестиваль аҿы аиааира ргеит аспорттә школ «Крылья Абхазии» акомандақәа, урҭ рыбжьара ахьтәи араӡнытәи аԥхьахәқәа еихыршеит. Аџьазтә медал аиуит Аҟәатәи амҵәышәмпылтә команда «Спартак». Уи афиналбжаҿы аиндаҭлаҩцәа рҿы маҷк иаҵахеит.
Атурнир аԥхьахәқәеи аиааиреи згаз зегьы Афестиваль аиҿкааҩцәа рҟынтәи аҳамҭақәеи аԥхьахәқәеи ранашьахеит.
