Арезолиуциа аҿы иазгәаҭоуп Аԥсны аенергетикатә система аобиектқәа рыҭира шзалмыршатәу.

Асоциалтә хьчаратә механизмқәа рыҟамзараан, ихымԥадатәиу, ауаҩԥсы зда дхәарҭам атауарқәеи ахәшәқәеи рыхәԥсақәа акыр реизҳара аныҟоу, аулафахәы маҷӡак ада ашьҭыхра анзалмыршахо аамҭазы, афымцамч ахархәаразы атариф акырынтә ашьҭыхра ауааԥсыра рзы еидара ӷәӷәаны иҟалеит.

Иҟоу атәыла Анапхгара имҩаԥнаго аполитика, арезолиуциа ишарбоу ала, асоциалтә, аекономикатә, аенергетикатә, адәныҟаполитикатә, уҳәа егьырҭ аҳәынҭқарратә напхгараҭара иадҳәалоу аусхкқәа рҿы акризистә ҭагылазаашьа арҿиеит.  

Аполитикатәи асоциал-еономикатәи акризис алҵреи аԥснытәи аҳәынҭқарратә шьақәгылашьа аиқәырхареи аҿиареи  хықәыс иҟаҵаны, жәлар рмитинг алахәылацәа Аҳәынҭқарра Ахада иҿаԥхьа дҵаны иқәдыргылоит:

Аоппозициа агәаанагарала зхыдҵақәа рынагӡара злымшаз атәыла Анапхгара зыԥшра ҟамҵакәа ԥхьатәара ашьҭра;

Иааиуа ҩы-шықәса рзы амилаҭтә хыдҵақәа рыӡбаразы амҩақәҵагатә хсаалага аԥҵара иалахәхо, Аҳәынҭқарра иҟны иҟало ареформақәа рзы Ахеилак аԥҵара;   

Қырҭтәылеи Аԥсни рыбжьара ахәаахәҭра алиберализациа азы ақәҵара аԥыхра;

Афымцамч ахархәаразы атарифқәа рышьҭыхра азы атәыла Анапхгара ақәҵара аԥыхра;

Аҳәынҭқарратә дача «Пицунда» Урыстәылатәи Афедерациа ахатәра аҳасабала аҭареи уи ахархәаразы аԥҟарақәеи рзы Апарламент аҿы аратифиакациа азы иҟоу аиқәшаҳаҭра шьҭахьҟа архынҳәра;

«Апарт-отельқәеи апартаментқәеи рзинтә шьаҭа ашьақәыргылара азы» азакәан апроект Апарламент ахь анашьҭразы агәҭакқәа мап рыцәкра;

Аенергетикатә система хазхаҭалатәи ахаҿқәа априватизациазы рыҭаразы агәҭакқәа мап рыцәкра;  

«Аекономикатә усқәа рзы аӡбаратәи абжьаҟазаратәи  азыӡбақәа аҩганктәи азхаҵареи анагӡареи рзы Урыстәылатәи Афедерациеи Аԥсны Аҳәынҭқарреи ирыбжьарҵаз Аиқәшаҳаҭра» Апарламент ахь ишдәықәымҵахо азы ауаажәлар ирбо-ираҳауа ажәа аҭара.