Аҟәа. Лаҵарамза 18, 2023 шықәса. Аԥсныпресс. Аԥсны Ахәахәҭра-ааглыхратә Палата Апрезидент Тамила Мерцхәлаа Ареспублика Ҭаҭарсҭан Ахада Рустам Минниханов иааԥхьарала XIV жәларбжьаратәи аекономикатә Форум «Урыстәыла– Исламтәи адунеи: KazanForum» лхы алалырхәуеит.
Лаҵарамза 17 рзы Афорум «Урыстәыла– Исламтәи адунеи: KazanForum» аҳәаақәа ирҭагӡаны, Ареспублика Ҭаҭарсҭан Ахәаахәҭра-ааглыхратә Палата аконгресс-зал аҿы Ареспублика Ахәаахәҭра-ааглыхратә Палата апрезидент Сергеи Катырин ихантәаҩрала ахәаахәҭра-ааглыхратә палатақәа жәларбжьаратәи афорум аартра мҩаԥысит. Сынтәа Афорум еизнагеит Урыстәыла арегионқәеи исламтәи аусеицура Аиҿкаара иалаху атәылақәа рҟынтәи 250 инареиҳаны алахәылацәа.
Иара убри аҽныҵәҟьа, лаҵарамза 17 азы, Анапхгара Аҩны аҿы Рустам Минниханови аҳәаанырцәтәи апалатақәа рнапхгаҩцәеи реиԥылара мҩаԥысит. Ҳаҭыр зқәу асас иаҳасабала аҳәаанырцәтәи апалатақәа рнапхгаҩцәа рхыԥхьаӡараҿы дыҟоуп Аԥсны Ахәаахәҭра-ааглыхратә Палата ахада Тамила Мерцхәлаа.
Аҳәаанырцәтәи ахәаахәҭра-ааглыхратә палатақәа рнапхгаҩцәа дрыҿцәажәо, Рустам Минниханов иазгәеиҭеит: «KazanForum» аинвестициатә лшарақәа рӡыргареи рыдгалареи, аҳәаанырцәтәи апартнирцәа рԥышәеимдара, аекономикатә еимадарақәа рыбжьаҵара рзы аеффективра злоу плошьадканы иҟоуп. Афорум абизнес-еилазаарақәа рхаҭарнакцәа рыбжьара иҿыцу аимадарақәа рышьақәыргылара азы алшара бзиақәа аԥнаҵоит».
Ахәаахәҭра-ааглыхратә палатақәа Жәларбжьаратәи афорум абар хышықәса инеиԥынкыланы Казань ақалақь аҿы имҩаԥысуеит.
Аԥснытәи аделегациа ари Афорум ҩынтәны ахы аланархәуеит.
