Аҟәа. Лаҵарамза 18, 2023 шықәса. Аԥсныпресс. Аҩныҵҟатәи аусқәа Рминистрра ахылаԥшратә абжьараҽҳәаратә хықәкытә программа «2023-2025шш. амҩаҿы аныҟәаратә ԥҟарақәа реилагара автоматтә фиксациа асистема аҿиара» анагӡаразы аҩныҵҟатәи аусқәа Рминистрра аҭаххрақәа рзы амаругақәа рыла аиқәыршәара азы иаарту аконкурс мҩаԥнагоит.
Аҳәынҭқарратә ҿаҵа зызку - Аԥсны аҩныҵҟатәи аусқәа Рминистрра аҭаххрақәа рзы амаругақәа рыла реиқәыршәара ауп.
Иаарту аконкурс аиҿкаара ахахьы иагоит аҩныҵҟатәи аусқәа Рминистрра аҟны иҟоу аконкурстә комиссиа. Уи аилазаараҿы иҟоуп Жәлар Реизара-Апарламент адепутатцәа, Аҳәынҭқарра Ахада Иусбарҭа, афинансқәа Рминистрра, аҩныҵҟатәи аусқәа Рминистрра ахаҭарнакцәа.
Аконкурс алахәхаразы азыҳәамҭақәа ралаҵара аҽҳәара – лаҵарамза 18 инаркны рашәарамза 1, 2023 шықәса, асааҭ 18:00 рҟынӡа.
Иаарту аконкурс алахәхаразы азыҳәамҭақәа ралаҵара ҟалоит абри аҭыӡҭыԥ ала: ақ. Аҟәа, Ак. Марр имҩаду, ахыбра №35. Аҩныҵҟатәи аусқәа Рминистрра Аусмҩаԥгарҭа (Аканцелиариа).
Аконкурстә зыҳәамҭақәа зҭоу аконвертқәа рхыртра рашәарамза 2, 2023 шықәсазы аконкурстә комиссиа ала имҩаԥгахоит. Аконкурстә документациа абара ҟалоит Аԥсны аҩныҵҟатәи аусқәа Рминистрра аофициалтә саит https://mvdra.org/documents/14060/аҿы.
