Аҟәа. Мшаԥымза 28, 2023 шықәса. Аԥсныпресс. Харитон Агрба атехникатә накаут ала Узбекистантәи аспортсмен Мирзакамол Нематов дииааит, ҳәа адырра ҟанаҵоит аҿари аспорти русқәа рзы аҳәынҭқарратә Еилакы апресс-маҵзура.
Аиндаҭлара мшаԥымза 28 рзы Таџьыкьысҭан аҳҭнықалақь Душанбе абокс ахәылԥаз аҳәаақәа ирҭагӡаны имҩаԥысит.
63,5 кьыла иҟоу акапантә категориа иаҵанакуа рыбжьара 8 раунд рыла иҟаз аиндаҭлара аԥшьбатәи араунд аҿы ҳџьынџьуаҩ игаз аиааирала ихыркәшахеит. Харитон Агрба изы ари апрофессионалтә ринг аҿы 12-тәи иааироуп.
Харитон Агрба – жәларбжьаратәи акласс аспорт азҟаза, абокс азы адунеи Ахраҿа араӡнытә аԥхьахәгаҩ, Европатәи ахәмаррақәа араӡнытә аԥхьахәгаҩы, Урыстәыла ачемпионатқәа ҩынттәи аԥхьахәгаҩы, астудентцәа рыбжьара абокс азы адунеи ҩынттәи ачемпион, WBA Fedecaribe, WBA Continental, IBF European, Евразиатәи абокстә апарламент атитулқәа змоу, «Интерконтинентальный кубок» ҳәа аҳамҭа манашьоуп. Харитон Агрба 2019 шықәсазы ипрофессионалтә кариера алагара инаркны 12 еиндаҭлара мҩаԥигеит, урҭ зегьы рҿы аиааирақәа игеит.
