Аҟәа. Мшаԥымза 20, 2023 шықәса. Аԥсныпресс. Мшаԥымза 18 – 19 рзы Ақыҭанхамҩеи ақыҭеи рыҿиара Ацентр Аԥснытәи аҳәынҭқарратә Университет агро-нџьныртә факультет астудентцәа рзы араҵлақәа реиҭаҳара иазкны атренинг мҩаԥнагеит.
Кациқыҭ ақыҭа аҿы араҵлақәа реиҭаҳара мҩаԥысуан. Астудентцәа араҵла аиҭаҳара асхема алкаареи адәы апланркра атехникеи ддырбеит, ҳәа адырра ҟанаҵоит Ацентр апресс-маҵзура.
«Аԥышәахысра ҩымш имҩаԥысуан. Астудентцәа аҵлақәа ахьеиҭаҳахо адәы ииашаны апланркреи аизшареи, анаҩс ҳара ҳзы аинновациатә ҵакы змоу араҵла ахкыжәла «Чандлер» аиҭаҳашьеи рзы хра злоу адыррақәа роуит», – ҳәа еиҭеиҳәеит ақыҭанхамҩеи ақыҭеи рыҿиара Ацентр агроном Гьаргь Ԥанҭиа.
«Чандлер» ҳәа изышьҭоу ахкыжәла зегьы раасҭа аҽаҩра бзиа аазышьҭуа хкны еицырдыруеит. Ари акхыжәла Калифорниатәи ауниверситет аҿы ианырҵеит. Аҵыхәтәантәи ашықәсқәа рзы ахкыжәла «Чандлер» ҿыц ишьақәгылахо абаҳчарақәа рҿы активла ахархәара аиуоит, уи зхаҭабзиара ҳаракӡоу ара аиура алнаршоит.
