Анаҩс Академиа Апрезидент зусуратә ҭыԥқәа рҿы хра злоу аусура назыгӡо, аспирантурақәа рҿы аҵара зҵо, Ареспублика анаукатә ԥсҭазаара активла зхы алазырхәо, жәларбжьаратәии аҳәынҭқарраҩныҵҟатәии анаукатә форумқәа ирылахәхо, астатиақәа зыҩуа, аҭҵаарақәа мҩаԥызго, акадрқәа реиҵааӡара знапы алаку, уҳәа   зегьы иҭабуп ҳәа реиҳәеит. Уажәазы уаанӡа ишьақәгыланы иҟаз аизара амҩаԥгаразы арегламент аиҭакрақәа алагалахеит:

Аԥсны Анаукақәа Ракадемиа Апрезидент ҷыдала зҽалызкааз аҵарауаа, Аԥсны Анаукақәа Ракадемиа аԥҵара 25-шықәса ахыҵра иазкны Раԥхьатәи аҿартә наукатә конференциа аиҿкааҩцәеи алахәылацәеи уахь иналаҵаны,  аҳаҭыртә шәҟәқәа ранашьара апроцедура амҩаԥгара азы ажәалагала ҟаиҵеит.

Анаҩс уи ааигәа адиссертациақәа зыхьчаз Инал Гыцба (афилологиа), Мадонна Ԥлиа (афилологиа), Роза Саакиан (апедагогика) анаукақәа ракадемиа адипломқәа ранеишьеит.

Қәҿиарала аусуразы аҵарауаа гәыԥҩык аԥаратә ҳамҭақәа ранашьахеит. Аԥсны Анаукақәа Ракадемиа академик-маӡаныҟәгаҩ Валентин Коӷониа Анаукақәа Ракадемиа  2022 - тәи ашықәс азы имҩаԥнагаз аусура азы аҳасабырбатә ажәахә аԥсуа бызшәала адгалара мҩаԥигеит. Аҳасабырба аурыс бызшәала аверсиа еиқәиршәеит Анаукақәа Ракадемиа Апрезидент актәи ихаҭыԥуаҩ, абиологиатә наукақәа рдоктор Сергеи Бебиа.