Аҟәа. Хәажәкырамза 27, 2023 шықәса. Аԥсныпресс. Акультура аминистр Даур Ақаҩба атеатр аусзуҩцәа хәажәкырамза 27 рзы иазгәарҭо атеатр Адунеизегьтәи Амш рыдиныҳәалеит.
Адныҳәаларатә текст аҟны ахәҭкахьала иазгәаҭоуп:
«Ҳаҭыр зқәу аҩызцәа, шәзанааҭтә ныҳәа - Адунеизегьтәи атеатр Амш инамаданы ишәыдышәкылар сҭахуп гәык-ԥсыкала иҟаҵоу адныҳәалара! Ари аныҳәа атеатр аусзуҩцәа рыдагьы Аԥсны есааира зхыԥхьаӡара ацло атеатр абзиабаҩцәагьы рзы иныҳәоуп.
Аԥсны беиоуп атеатралтә традициақәа рыла. Уи аиашазы иналукааша ахҭысқәа, арҿиаратә еихьӡарақәа, асахьаркыратә аартрақәа рыла игәылҭәаау амҩа ду ианысыз, зыхьӡ нагоу атеатралтә коллективқәа рыла агәы дууп. Иахьа урҭ Рыԥсадгьыл анҭыҵгьы еицырдыруеит.
Аԥсуа театралтә ҟазара аҟазаара аамҭа иалагӡаны еиҵагылеи ҳреспублика атеатралтә ҟазара аҿиареи ашьақәгылареи хәызмаӡам злагала алазгалаз аусзуҩ дуқәа иакымкәа-иҩбамкәа абиԥарақәа еиҵагылахьеит. Иалырхыз аус азы еицакра змам гәык-ԥсыкала азыҟазаара аадырԥшуеит атеатр ахь аусуразы иаауа аҿар».
Аминистр атеатр аусзуҩцәа зегьы ирзеиӷьаишьеит ақәҿиара зцу ақәыргыларақәеи аԥхьарбарақәеи, аинтерес зҵоу агастрольқәа, ахәаԥшцәа рҟынтәи еицакра змам ахшыҩзышьҭра, аншлагқәа, ҵыхәаԥҵәарада анапеинҟьабжьқәа!
