«Апроект аҿы Урыстәыла аганахьала аԥыжәара змоу субиектны иҟалоит Нхыҵкавказтәи афедералтә Университет, аха аусурахь ҳара иара убас иадҳаԥхьалалоит егьырҭ урыстәылатәи аҵараиурҭақәагьы. Ари Урыстәыла аҵараиурҭақәа зегьы русура еидызкыло плошьадканы иҟалоит. Ацентр аартра анаҩс, аҳәынҭқарратә дҵа инақәыршәаны, ҳара егьырҭ апроектқәагьы рхианы иҳамоуп. Иаагозар, аҳәынҭқарратә маҵурауаа рзанааҭдырра аҩаӡара ашьҭыхразы акурсқәа. Уаҵәы ҳара ахыбра ҳаҭааны игәаҳҭоит, еилаҳкаауеит уи аиҭашьақәыргылареи афымцамч анагареи рзы иҟаҵатәу», - ҳәа иазгәеиҭеит иара.
Инал Габлиа, цәыббрамза 1, 2023 шықәсазы Ацентр аусура ахацыркра шалыршахо азы агәра ганы дыҟоуп. Иарбоу Ацентр Аԥсны арҵаҩцәа рзы адыррақәа рхыҵхырҭаны иҟоу анаука-ҵарадырратә центрны иҟалоит. Ари апроект Урыстәылатәи Афедерациа иреиҳаӡоу аҵарадырреи анаукеи Рминистрра аҳәынҭқарратә дҵа анагӡара аҳәаақәа ирҭагӡаны, иара убас Урыстәыла, Аԥсны, Аахыҵ Уаԥстәыла, Ермантәыла ауниверситетқәа еидыхкыло Аконсорциум «Кавказ Ду» аганахьала имҩаԥгахоит.
Нхыҵкавказтәи афедералтә Университети Аԥсны аҵарадырра Аминистрреи, аҵарадырратәии анаукатәии аиҿкаарақәеи 2014 шықәса раахыс активла аусеицура рыбжьоуп. Аусеицура ашықәсқәа ирҭагӡаны Нхыҵкавказтәи афедералтә Университет аспециалистцәа Аԥсны азы 9 азинтә шәҟәынҵақәа еиқәдыршәеит. Ауниверситет аҟны еиҿкааз азанааҭдырра аҩаӡара акурсқәа ирхысит 1700 - ҩык инареиҳаны ареспублика аҳәынҭқарратә маҵурауааи аҵарадыра аусзуҩцәеи.
