Аҟәа. Хәажәкырамза 21, 2023 шықәса. Аԥсныпресс. Аԥсны аихамҩа аҭоурых аҿы раԥхьаӡа акәны еиԥырҟьам аусуратә шьаҭала Аԥсныҟа аныҟәара иалагоит аконтеинертә дәыӷбақәа. Абри азы абрифинг аҿы адырра ҟаиҵеит Аԥсны Аихамҩа адиректор Хада ицхырааҩ Октаи Хазириши.
Уи аполитикатә дгылара ада ас еиԥш акрызҵазкуа апроект анагӡра залыршахомызт ҳәа иазгәеиҭеит.
«Аҳәынҭқарра Ахада Аслан Бжьаниа иарбоу азҵаара аҿы акыр ацхыраара ҟаиҵеит. Актәи адәыӷба адәықәлара аламҭалазы уи хаҭала Иаарту Аокционертә Еилазаара «Урыстәыла Аихамҩақәа» адиректор Хада Олег Белозиоров иҽимидеит, иарбоу апроект анагӡара иадҳәаланы ицәырҵуаз иуадаҩу азҵаарақәа рыӡбараҿы ацхыраара ҟаиҵеит», – ҳәа иҳәеит Октаи Хазириши.
Уи ишазгәеиҭаз ала, аконтеинертә дәыӷба – ари алогисттә сервис ауп, даҽакала иуҳәозар, аграфик инақәыршәаны иахьдәықәло астанциа аҟынтәи амҩа ахьхоу астанциа аҟынӡа иныҟәо аидарамҩангагатә дәыӷба ауп. Уахыки ҽнаки рыла иарбоу адәыӷба аццакра 800 - 1000 километр рҟынӡа инаӡоит. Иаагозар, аидарамҩангагатә дәыӷба 10 -14 мшы рыла иаауазар, аконтеинертә дәыӷба ҩынтә рҟынӡа ирласны инаӡоит.
«Аихамҩақәа рхархәарала аус зуа аилазаарақәа еиҳа аԥыжәарақәа рымоуп – уи аидара аагара азы иақәырӡхо аамҭеи аидара аиагара азы ахәԥсеи реиҵатәра ауп. Уи ҳара ҳазгәаҭарақәа рыла, 25-30% рыла еиҵоуп. Аконтеинер – ари иуниверсалу хархәагоуп, уи аидара аҵәахреи ашьҭаҵареи рхы ахархәара ҟалоит, иара аихамҩатә платформа иақәыхны даҽаџьара еиҭаугар алшоит. Аидарақәа убри аан ԥырхага роуӡом»,- ҳәа иҳәеит Октаи Хазириши.
Уи иажәақәа рыла, ас еиԥш аидеиа «Аԥсны Аихамҩа» анапхгараҭара ирызцәырҵит аидарамҩангара амҽхак арҭбаара, аидарақәа рыхкырацәара ахь аиасреи рзы.
«Ари аидеиа Аԥсны азы иҿыцуп. Ареспубликатә Унитартә Наплакы «Аԥснытәи Аихамҩа» араҟа аидарамҩангаҩы иаҳасабала иқәгылоуп. Аконтеинертә дәыӷбақәа иазԥхьагәанаҭоит аконтеинерқәа аус рыдулара. Убри аҟнытә ҳара иарбоу афункциақәа рынагӡара зхахьы изгарц зылшо хазхаҭалатәи аиҿкаареи ҳареи апартниорра ҳабжьаҵара хымԥадатәны иҳаԥхьаӡеит. Ари азҵаарагьы ауадаҩрақәа аҵан. Еиуеиԥшым аконсультациақәа мҩаԥган. Ҳара аҵыхәтәаны иалаҳхит Зҭакԥхықәра ҳәаақәҵоу Аилазаара «Транспортинг», уи аконтеинертә еидарамҩанагара аганахьала аԥышәа бзиа амоуп. Ҳара аиқәшаҳаҭра анапаҵыҩреи аҭакԥхықәрақәа реихшареи мҩаԥаагеит. Аилазаара Очамчыра ақалақь аҿы аконтеинертә терминал аргылареи уи иахәҭоу аиқәыршәагақәа рыла аиқәыршәареи ахахьы иагоит», – ҳәа иҳәеит Октаи Хазириши. Уи иажәақәа рыла, адәыӷба ааигәа аԥснытәи аҳәаа аҟынӡа инаӡоит.
«Ашьжьымҭан иҟаз аинформациа ала, уи астанциа «Тихорецкая» аҟынӡа иааихьан, уаантәи аҳәаа аҟынӡа 200 километр роуп ибжьоу, уаҵәы уи аҽеиԥшьратә станциа «Веселое» аҟынӡа инаӡароуп. Уажәы хықәкыс иҳамоу адәыӷба адкылареи аус адулара алыршареи роуп», – ҳәа иажәа хыркәшо иҳәеит иара.
