Аҟәа. Хәажәкырамза 18, 2023 шықәса. Аԥсныпресс. Аԥсны ажурналистцәа Реидгыла ахантәаҩы Руслан Ҳашыг Аҟәа ақалақь аҿы Урыстәылатәи Афедерациа ажурналистцәа Реидгыла Ҟарачы-Черкессиатәи Ареспублика арегионалтә ҟәша ахантәаҩы Увжук Тхагапсов иԥылара мҩаԥигеит, ҳәа адырра ҟанаҵоит Аԥсны ажурналистцәа Реидгыла апресс-маҵзура.
Аиԥылара аҿы ирылацәажәеит апроектқәа реицынагӡареи аусмҩаԥгатәқәа реицымҩаԥгареи ирыдҳәалоу азҵаарақәа жәпакы. Ҷыдала ахшыҩзышьҭра аҭан аиашьаратә республикақәа ржурналистцәа еидызкыло ауаажәларратә еиҿкаарақәа ҩба рыбжьара аусеицура абжьаҵара азы аиқәшаҳаҭра апроект аиқәыршәара азҵаара.
Руслан Ҳашыги Увжук Тхагапсови ҳаамҭазтәи ауаажәларратә еилазаара аԥсҭазаара аҿы амасс-медиа инанагӡо ароль азы ргәаанагарақәа еибырҳәеит, иара убас ажурналисттә материалқәа ремадара аганахьала Ҟарачы-Черкессиатәи Ареспубликеи Аԥсны Аҳәынҭқарреи рмассатә информациа ахархәагақәа ацхыраара рыҭара иаҵоу аҵакы ахадара азгәарҭеит.
Руслан Хашыг, Аԥсны ажурналистцәа Реидгыла аиашьаратә республика ажурналистцәа 1992-93 шш. Аԥсны жәлар рџьынџьтәылатәи еибашьра аҿы Аиааира агара Амш 30- шықәса ахыҵра инамаданы 2023 шықәсазы имҩаԥгахо, «Цқьа идырым аибашьра аҭоурыхқәа» ҳәа хыс измоу арҿиаратә конкурс алахәхара шрыдигало азгәеиҭеит.
Уи игәаанагарала, арыцҳареи ашәарҭареи иҭагылаз, еибашьуаз аиашьаратә жәлар хатәгәаԥхарала рыцхырааразы иааз рфырхаҵара 1992 – 1993 шш. Аԥсны жәлар рџьынџьтәылатәи еибашьра аҿы Аиааира агара 30- шықәса ахыҵра азгәаҭара аламҭалазы ажурналистцәа рматериалқәа рзы ихадоу атемақәа иреуахар ауп.
Аиԥылара далахәын Ареспубликатә ҳәынҭқарратә усбарҭа «Аԥснымедиа» адиректор Хада Роберт Џьопуа.
