Аҟәа. Хәажәкырамза 6, 2023 шықәса. Аԥсныпресс. Иахьа иазгәарҭоит ашәҟәыҩҩы ду, ахәыцҩы, адыр – Фазиль Абдул-иԥа Искандер иира Амш.
Фазиль Абдул-иԥа Искандер диит хәажәкыра 6, 1929 шықәса Аҟәа ақалақь аҿы, хылҵышьҭрала иџьамыз ақьырмыҭ зауад ԥыхьатәи ампыҵакыҩ иҭаацәараҿы. 1938 шықәсазы заԥхьаҟа ишәҟәыҩҩхараны иҟаз Фазиль иаб адепортациа аҳасабла Асовет Еидгыла далганы ддәықәҵахеит. Уаҳагьы аби аԥеи изеибамбаӡеит. Фазиль изҳауан Чегем ақыҭа, ианшьцәа рҿы.
1947 шықәсазы Фазиль Искандер Аҟәа ақалақь аҿы аурыс школ далгеит ахьтәы медал ала, анаҩс дҭалеит Москватәи абиблиотекатә Институт, 1951 шықәсазы дыиасит А.М.Горки ихьӡ зху Алитературатә Институт ахь. Уи далгеит 1954 шықәсазы. Аус иуан Курски Воронежи ргазеҭқәа рҿы. 1956 шықәсазы Аҟәаҟа дхынҳәит, Аҳәынҭқарратә ҭыжьырҭа аԥсуа ҟәша аредакторс аус иуан. Аҭаацәара даналала ашьҭахь, 1962 шықәса инаркны уи иааиԥмырҟьаӡакәа Москва ақалақь аҿы дынхон. Фазиль Искандер раԥхьаӡатәи ипоетикатә рҿиамҭақәа цәырҵит 1952 шықәса азы, раԥхьаӡа ипроза акьыԥхь абеит 1956 шықәсазы ажурнал «Пионер» адаҟьақәа рҿы.
Фазиль Искандер иажәеинраалақәа раԥхьатәи аизга «Горные тропы» урыс бызшәала 1957 шықәса азы Аҟәа ақалақь аҿы иҭыҵит. 1962 шықәсазы ажурнал «Юность» аҿы икьыԥхьхеит ҩ-жәабжьк. Фазиль Искандер иҩымҭақәа рнылон ажурналқәа «Литературная Абхазия», «Новый мир», «Неделя» рҿы. 1966 шықәсазы, ажурнал «Новый мир» аҿы икьыԥхьхеит ашәҟәыҩҩы раԥхьатәи иповест — «Созвездие Козлотура», уи Фазиль Искандер асовет литература иналукааша аусзуҩцәа реилазаара даланагалеит.
