Иааизакны уахәаԥшуазар, Ацентр амаругақәа рыла апроблема амаӡам, ахәышәтәратә бҩарҵәыра азы иахәҭоу аиқәыршәагақәеи атренажиорқәеи зыҩнагылоу азал ыҟоуп, иара убас иҟоуп гидрокинезотерапиа азы аӡҭарчы. Ацентр аҿы иара убас иҟоуп асурдологиатә кабинет. Араҟа аспециалистцәа ахәыҷқәа рлымҳа аҵарра аганахьала адиагноз шьақәдыргылар алшоит.
Убри аан, шьақәыргылагақәак рыԥсахра аҭахны иҟоуп, урҭ русура иазыԥҵәаз аҽҳәара нҵәеит, иара убас кабинетқәәак рзы аинвентерь арҿыцра ахәҭаны иҟоуп.
Лиана Емухвари иара убас акрыфарҭеи ахәмаррақәа рзали рырҭбааразы иҟоу агәҭакқәа дрылацәажәеит.
Едуард Быҭәба апациентцәа рҭаацәагьы дрыҿцәажәеит. Урҭ аспециалистцәа русура ахәшьара ҳарак арҭеит. Аҭаацәа ражәақәа рыла, ахәыҷқәа Ацентр аҟны ироуа ареабилитациа акыр ирыхәоит.
Аминистр аринахысгьы Ацентр ахылаԥшра аҭара шыҟало азы ажәа риҭеит.
«Сынтәа ҳара урыстәылатәи аспециалистцәа радыԥхьарала ареабилитациа амҩаԥгара азы аконференциа ду амҩаԥгара ҳгәы иҭоуп. Сара сгәаанагарала, уи ҳара зегьы ҳзы хра злоу усмҩаԥгатәны иҟалоит. Ҳхәыҷқәа еиҳа иҳараку аҩаӡара аҿы профессионалла ацхыраара рыҭара азы ҳалшарақәа ирыцаҳҵалоит»,– ҳәа иҳәеит Едуард Быҭәба.
2022 шықәсазы иарбоу Ацентр аҟны ареабитациа иахысит 240-ҩык инарзынаԥшуа, згәабзиара аганахьала еиуеиԥшым апроблемақәа змоу ахәыҷқәа.
