Аҟәа. Жәабранмза 20, 2023 шықәса. Аԥсныпресс. Жәабранмза 25 рзы В.Г.Арӡынба ихьӡ зху Арратә Ахьӡ-Аԥша амузеи Аԥснытәи ар Мрагыларатәи афронт аҿы ахьчаратәии ажәыларатәии аибашьрақәа 30- шықәса ахыҵра иазкны Очамчыра араион Маркәыла ақыҭан арра-ҭоурыхтә експедициа «Ахьӡ-Аԥша амҩақәа рыла» еиҿнакаауеит.
Аекспедициа апрограмма аҿы иҟоуп:
1992-1993шш. Аԥсны жәлар Рџьынџьтәылатәи еибашьра аветеранцәеи ақыҭеи араиони рактиви, Маркәылтәи абжьаратәи ашкол арҵаҩцәеи аҵаҩцәеи рԥылара;
Аԥсны ахьыԥшымра зхы ақәызҵаз аибашьцәа рбаҟақәа рымҵан ашәҭ шьыҵәрақәа рышьҭаҵара;
Арра-патриоттә тема ала ажәеинраалақәа раԥхьареи ашәақәа рынагӡареи;
Ақырҭуа мпыҵахаларатә архәҭақәа рҿагыларақәа ахьымҩаԥысуаз аҭыԥқәа рҭаара, - Мрагыларатәи афронт аҿы жәабранмзатәи аибашьрақәа ирылахәыз асолдатцәеи афицарцәеи ргәалашәарақәа разыӡырҩра;
Зыӡбахә ҳәоу ахҭысқәа ирылахәыз рҟынтәи аибашьратә материал аизгара.
Аекспедициа алахәылацәа Аҟәантәи амҩа иқәлаанӡа реизгара мҩаԥысуеит асааҭ - 09:00 рзы, В.Г.Арӡынба ихьӡ зху Арратә Ахьӡ-Аԥша амузеи аҿаԥхьа.
