Аԥсны аҩныҵҟатәи аусқәа Рминистрра адыррақәа рыла, 2022 шықәсазы Аԥсны ашәҟәы иҭагалахеит 214 амҩа-транспорттә хҭыс, иҭахеит – 64-ҩык, 296 –ҩык еиуеиԥшым ахәрақәа роуит. Зынӡа ареспублика аҿы ашәҟәы иҭагалахеит 70 430 автотранспорттә хархәагақәа.
30.Ажьырныҳәа.2023
АҨНЫҴҞАТӘИ АУСҚӘА РМИНИСТРРА ИАКЬЫԤХЬИТ 1990 – 2022 ШШ. РЗЫ ИҞАЛАЗ АМҨА-ТРАНСПОРТӘ ХҬЫСҚӘА РЫСТАТИСТИКА.
Аҟәа. Ажьырныҳәамза 30, 2022 шықәса. Аԥсныпресс. Аԥсны аҩныҵҟатәи аусқәа Рминистрра асаит аҿы икьыԥхьхеит 1990 - 2022 шш. иҟалаз амҩа-транспорттә хҭысқәа рыстатистика. 1992- 1993 шш. азы аинформациа ыҟаӡам, уи Аԥсны жәлар рџьынџьтәылатәи еибашьра анцоз аамҭа ауп.
Аибашьра ҟалаанӡа ҩы-шықәса рыла (1990 – 1991 шш.) ашәҟәы иҭагалан 884 амҩа-транспорттә машәыр, урҭ ирыхҟьаны иҭахеит 307-ҩык, еиуеиԥшым ахәрақәа роуит 904-ҩык.
Аибашьрашьҭахьтәи аамҭахәҭа азы ( 1994 -2022 шш.) амҩа-транспорттә хҭысқәа аиҳарак ҟалеит 2015 шықәсазы – 220. Еиҳа ауаа ҭахеит 2016 шықәсазы – 80-ҩык. Амҩа-транспорттә хҭысқәа ирыхҟьаны зегьы реиҳа еиуеиԥшым ахәрақәа роуит 2019 шықәсазы – 332-ҩык.
