Аҟәа. Жәабранмза 13, 2023 шықәса. Аԥсныпресс. Аԥсны Аҳәынҭқарра Ахада Аслан Бжьаниа Аԥсны Жәлар рартист Лиудмила Гәымԥҳа лира амш лыдиныҳәалеит.
Адныҳәалараҿы иҳәоуп:
«Ҳаҭыр зқәу Лиудмила Хьыцкәыр-иԥҳа!
Гәык-ԥсык ала ишәыдысныҳәалоит Шәирамш! Шәара шәырҿиара бзианы ирдыруеит ҳтәылаҟнеиԥш уи анҭыҵгьы. Шәара аԥсуа музыкатә культура шәахаҿроуп, шәашәақәа уи иузаҟәымҭхо иалоуп.
Авокалтә инструменталтә ансамбль "Аԥсны-67" агәыԥ аҟны ианҵаз амузыкатә аԥҵамҭақәа "Фама", "Наныкьара", "Ачара ду" аԥсуа естрадатә ашәақәа бзиа избо зегьы еицырдыруеит. Жәлар рыбзиабара, разхаҵара, раҳаҭыр шәаԥсахеит аҟнытә Шәара ишәыхҵоуп Аԥсны Жәлар артист ҳәа аҳаҭыртә хьӡы.
Шәара шәыԥшӡара, шәбаҩхатәра, шәпатриотизм, шәҟазшьа аҷыдарақәа аԥсуа ԥҳәыс лхаҿсахьазы иҿырԥшыганы иҟоуп. Акыршықәса шәиаҵәа ҳкультура арлашалааит, иара убас абаҩхатәра злоу Аԥсны абиԥара ҿыцқәа рзы имҩақәҵаганы иҟазааит.
Ҳаҭыр зқәу Лиудмила Хьыцкәыр-иԥҳа! Ишәзааигәоугьы Шәаргьы ишәзеиӷьасшьоит агәабзиара агәамч, шәырҿиараҟны аизҳазыӷьареи аихьӡарақәеи!»
