Лиудмила Хьынкәыр-иԥҳа Гәымба – аԥсуа шәаҳәаҩы, аԥышәа ду змоу амузыка арҵаҩы, Аԥсны жәлар рартистка диит жәабранмза 13, 1953 шықәса рзы. Далгеит А.М. Горки ихьӡ зху Аҟәатәи аҳәынҭқарратә арҵаҩратә институт  афилологиатә факультет. Далахәын аԥсуа естрада апионер Иури Гериа иаԥиҵаз астуденттә естрадатә ансамбль.

1972 шықәсазы Лиудмила Гәымба авокал-инструменталтә ансамбль «Аԥсны-67» асолиткас дҟалоит. Уи аԥҵан 1967 шықәсазы, Аԥсны жәлар рартист Шьалуа Аҩардан напхгара аиҭон.  80-тәи ашықәсқәа рзы ансамбль  «Аԥсны-67» - Асовет Еидгыла ателехәаԥшра Хада ателедыррақәа - «Споемте, друзья» и «Шире круг», иара убас аспорткомплексқәа «Динамо», «Олимпийский» рҿы урыстәылатәии аҳәаанырцәтәии аестрада алархәны имҩаԥысуаз агала-концертқәа еиԥынкыланы ирылахәхон.  

1988  шықәсазы Лиудмила Гәымба Витебск ақалақь аҿы имҩаԥысуаз аполиак ашәа Жәларбжьаратәи афестиваль алауреатра лоуит.   Уи ашьҭахь уи Польшаҟа аконцертқәа рымҩаԥгаразы ааԥхьара лоуит. Лара Германиа-Асоветеидгыларатә еиҩызареи Кампучиа-Асоветеидгыларатәи еиҩызареи  реилазаарақәа  рааԥхьарала  агастрольқәа лыманы Германиа, Кампучиа дырҭаахьан.  Араҟа уи лықәгыларақәа акыр қәҿиара дула имҩаԥысит. Изныкамкәа Асовет Еидгыла ареспубликақәа рахь агастрольқәа мҩаԥылгахьан.

Авокалтә усура инамаданы лара аҿар рыбжьара аҟыбаҩ злоу рыԥшаара иазкны активла аус луан. Уи хыԥхьаӡара рацәала имҩаԥысуаз арҿиаратә конкурсқәа, апроект «Апсны Стар» уахь иналаҵаны, изныкымкәа аӡбаҩцәа реилазаараҿы дыҟан.