Аҟәа. Жәабранмза 8, 2023 шықәса. Аԥсныпресс. Аԥсны адәныҟатәи аусқәа Рминистрра Аҳәынҭқарра Ахада Аслан Гьаргь-иԥа Бжьаниа иҟаиҵо ацхыраарала аԥхьагыла ҿарацәа адгылара рыҭара аусхк аҟны жәларбжьаратәи аусеицура арҿиоит, Аԥснытәи ашколқәа роушьҭымҭацәа Урыстәыла иналукааша арҵаратә программақәа рахь рнеираз алшарақәа арӷәӷәоит.
«Сынтәа ҷыдала азхьаԥшра аҳҭоит аинформациатә технологиақәеи анџьныртә занааҭқәеи рхырхарҭа, беларуссиатәи аҵараиурҭақәеи ҳареи аинырра ҳабжьоуп. Ишдыру аиԥш Беларуссиа IT аусхк аҟны аинтеллектуалтә капитал ду амоуп», - ҳәа аҳәамҭа ҟаиҵеит адәныҟатәи аусқәа рминистр Инал Арӡынба.
Уи ари ахырхарҭаҿ уажәы абиуџьет ҭыԥқәа рҿы аҭахрақәа еиҳа ишеҳахаз, убри аҟнытә абиуџьеттә ҭыԥқәа рахь иҭало рдырра аҩаӡара агәаҭара уаанӡа еиԥш аасҭа еиҳа иацклаԥшны ишымҩаԥгахо ҷыдала иазгәеиҭеит. «Ари ахырхарҭаҿ уажәы абиуџьет ҭыԥқәа рҿы аҭахрақәа еиҳа еиҳахеит. Аҳәаанырцәтәи аҵараиурҭаҿы абиуџьет ҭыԥ аиура ари ҭакԥхықәроуп аҳәынҭқарреиԥш ҳастудентцәа рҵара ахә ахызшәаауа ашәахтәшәаҩцәа рҿаԥхьагьы. Азин ҳамам уала-ҭахыла, еиуаратә ҟазшьала аус азнеира. Аҳәынҭқарратә хәыцра хымԥадатәны иҟоуп», - ҳәа инаҵшьны иазгәеиҭеит адәныҟатәи аусқәа рминистр Инал Арӡынба.
