Аиқәырхаратә Хылаԥшырҭа апиротехникатә ҟәша аусзуҩцәа аҭыԥ аҿы инеины ақыҭауаа ирыԥшааз абџьари аџьаԥҳани ықәганы иаҳа иахьшәарҭам аҭыԥ ахь инаганы иԥыржәеит.
07.Жәабран.2023
ИҶЫДОУ АҬАГЫЛАЗААШЬАҚӘА РЗЫ АМИНИСТРРА АИҚӘЫРХАҨЦӘА АҚЫҬАУАА ИРЫԤШААЗ АРҬҞӘАЦГАҚӘА РЫҚӘГАРА МҨАԤЫРГЕИТ.
Аҟәа. Жәабранмза 7, 2023 шықәса. Аԥсныпресс. Ашьха ашьапаҿы иԥсаҟьаны икажьыз ажәытә рҭҟәацгақәа жәабран 6 рзы Гәдоуҭа араион ақыҭа Амжыкхәа (ԥыхьатәи Агараки ақыҭа) аҿы ақыҭауаа рыла иԥшаан. Урҭ рыԥшаамҭа азы адырра Иҷыдоу аҭагылазаашьақәа рзы Аминистрра ахь иҟарҵеит.
Иҷыдоу аҭагылазаашьақәа рзы Аминистрра апресс-маҵзура иҟанаҵо адыррақәа рыла, иԥшааз арҭҟәацгақәа ирылан ареактивтә ашьаҟартә амцаршәгақәа «Шмель» ҩ-цырак, ареактивтә атанкҿагыларатә граната, анапылатә гранатаршәга ПГ-7, уи иақәшәо аџьаԥҳани, анапытә кумулиативтә граната, ашьаҟарҿагыларатә минақәа ԥшьба.
