Уи иара убас Аминистрра асистема аматериал-техникатә еиқәыршәара акыр ишеиӷьхаз азгәаҭо иарбоу Ахылаԥшырҭа аусура аҩаӡара еиҳагьы ишазҳауа азы агәыӷра ааирԥшит. Аплантә хыдҵақәа рынагӡара азы иҟоу алҵшәақәа иааизакны атәыла аҿы ашәахтәқәеи аизгатәқәеи рзы Аминистрра Аппарат Хадеи аҭыԥқәа рҿы аинспекциақәеи рхықәкыхырхарҭатә усура иадҳәалахеит. Ашықәс алагара инаркны уажәтәи аамҭа аҟынӡа ареспублика араионқәа зегьы рҿы аплантә хыдҵақәа хра злоу адинамика ала инагӡан. 2022 шықәса азы иара убас Аминистрра ахылаԥшра аҵаҟа иҟоу ашәахтәқәа рыхкқәа зегьы рыла арбагақәагьы инацҵаны инагӡан. Ашәахтәқәҵаратә усбарҭақәа русура аҿы зегьы раасҭа ихадоу, насгьы иуадаҩу процессқәаны иҟоуп ашәахтә шәатәқәа рганахьала иҟоу ауалқәа реиҵатәра иазку аусура. Иарбоу ахырхарҭа ала ашәахтә усбарҭақәа рыструктуратә ҟәшеиҵақәа рыла ауалқәа рзы аинкассатә хыдҵақәа рышьақәыргылара азы аусура мҩаԥган, иара убас аматериалқәа аӡбаратә нагӡаҩцәа Рмаҵзура ахь адәықәҵара, ауалқәа зымшәо рзы адыррақәа - азинхьчаратә усбарҭақәа рахь. Убри инамаданы 2018 шықәса инаркны ашәахтәқәеи аизгақәеи рзы Аминистрра аӡбаратә нагӡаҩцәа Рмаҵзура аусеицура рыбжьоуп.
2022 шықәсазы аӡбаратә нагӡаҩцәа Рмаҵзура ахь инашьҭын 255 материал. Уи аицҵалыҵ 300 млн. мааҭ рҟынӡа инаӡеит, идыршәан 87 млн. мааҭ иреиҳаны. Иааизакны арҭ ахылаԥшырҭақәа русеицура аамҭа иалагӡаны ашәахтә усбарҭақәа рыла зеицҵалыҵ 726 млн. мааҭ рҟынӡа инаӡо 580 материал аӡбаратә нагӡаҩцәа Рмаҵзура ахь идәықәҵахеит. Ауал зқәыз идыршәахеит 100 млн. мааҭ инареиҳаны. Ашәахтәқәҵаратә закәанԥҵара еффективла анагӡара хықәкыс иҟаҵаны ашәахтәқәеи аизгақәеи рзы Аминистрра 2022 шықәса аҳасабырбатә аамҭахәҭа азы Аминистрра иаҵанакуа аинспекциақәа русура амониторинг азы комплексла ахылаԥшратә усмҩаԥгатәқәа мҩаԥысуан. Ас еиԥш аусмҩаԥгатәқәа рымҩаԥгара есышықәса атәыла аҳәынҭқарратә биуџьет ашәахтәқәеи егьырҭ аҳәынҭқарратә шәатәқәеи ралагалара хра злоу анырра анаҭоит. Убас, 2022 шықәса рзы Аҟәа ақалақь аҿы ашәахтә инспекциа аусура комплексла агәаҭара мҩаԥган. Уи аихшьаалақәа рыла, иаарԥшыз аилагарақәа рырҽеиреи ашәахтәқәҵаратә усура атәыла ашәахтә закәанԥҵара иашьашәало аҟаҵареи иазкыз ауснагӡатәқәа мҩаԥган.
Зынӡа 2022 шықәсазы ашәахтәқәеи аизгақәеи рзы Аминистрреи аҭыԥқәа рҿы аинспекциақәеи рыла имҩаԥган 739 адокументалтә гәаҭарақәа, урҭ реихшьаалақәа рыла ашәахтә закәанԥҵара аилагара азы инацҵаны ахыԥхьаӡалара 344 472,4 нызықь мааҭ рҟынӡа инаӡеит, 49 684,6 нызықь мааҭ рҟынӡа инаӡо ашәахтәқәагьы уахь иналаҵаны, ахараԥсатә санкциақәа – 294 787,8 нызықь мааҭ. 2022 шықәсазы Аԥсны ашәахтәқәеи аизгақәеи рзы Аминистрра ашәахтәқәеи егьырҭ ихымԥадатәиу ашәатәқәеи рымҩаԥгара ахылаԥшара аҭара ахаҭабзиара аиӷьтәра алнаршоит. Аԥсны ашәахтәқәеи аизгақәеи рзы Аминистрра Аппарат Хада аҿы Ахылаԥшырҭа аинспекциақәа русзуҩцәа азанаҭдырратә аттестациа рахгара азы аӡбамҭа рыдыркылеит. Уи иабзоураны акадртә ӡбамҭақәа рыдкыларазы амеханизм аԥҵан.
2022 шықәсазы ас еиԥш аттестациа иахысит ашәахтәқәеи аизгақәеи рзы Аминистрра Аҟәа ақалақь ала аинспекциа аусзуҩцәа. Иарбоу аттестациа аихшьаалақәа уажәы аҭҵаара астадиа аҿы иҟоуп. Анаҩс аиԥш-зеиԥшу аусмҩаԥгатәқәа азԥхьагәаҭоуп ашәахтәқәеи аизгақәеи рзы Аминистрра иаҵанакуа егьырҭ инспекциақәа зегьы рҿы.
2023 шықәса алагара инаркны ашәахтәқәеи аизгақәеи рзы Аминистрра ашәахтә шәатәқәа ралагалара алҵшәақәа реиӷьтәра азы инагӡаны илхым ашәахтә ала ахылаԥшра арӷәӷәара иазкны аусмҩаԥгатәқәа рымҩаԥгара азԥхьагәанаҭоит. Аԥсны ашәахтәқәеи аизгақәеи рзы Аминистрра иқәгылоу ахыдҵақәа рынагӡара, аекономика асубиектқәа ршәахтә ҭакԥхықәра анагӡара ахылаԥшра арӷәӷәара иазку аусура амҩаԥгара азԥхьагәанаҭоит.
