«Иҳацхраараны иҟоу апроблемақәа ҳзаԥырҵоит Ҳара иаҳҭаху аԥаратә хархәагақәа хықәкызаарала ихшыҩркны иныхлазарц. Еиҳа еиӷьуп ҳара астационартә хәышәтәразы ҳветеранцәа дәықәаҳҵаларц. Урҭ ианаамҭоу рыхәшәтәра еиӷьуп лҵшәада миллионла аԥаратә хархәагақәа рныхра аасҭа.  Лассы-лассы, аиҳарак ашықәс ахыркәшамҭаз, дара ахәшәқәа ахьырмыхәо азы ахәышәтәразы рышьҭразы ҳара иҳадҵаалоит», –  ҳәа иҳәеит аинвалидцәа Рфонд ахантәаҩы ихаҭыԥуаҩ Емзар Ашуа. Убри аан уи инаҵшьны иазгәеиҭеит, ахәшә аиашазы ихымԥадатәны ианыҟоу ари ахәҭаҷ хымԥадатәхоит. Аха  зны-зынла убас еиԥш аҭагылазаашьақәа шьақәгылоит  ахәшәқәа изызкыз акәымкәа даҽаџьара иандәықәҵахо.  Убас, шықәсык азы  илҩаахо апрепаратқәа рыхәԥса аицҵалыҵ 200-300 нызықь мааҭ рҟынӡа инаӡозар, еиҳа ихшыҩркхон иарбоу аԥаратә хархәагақәа комплексла аклиникақәа рҿы ахәышәтәразы иныхзар.  

Иазгәаҭатәуп, Афонд ипрецедентдоу ахҭыс ишақәшәаз.  Убас, Гәдоуҭатәи аполиклиника аҿы апациент ихьӡала акала ишьаҭаркымкәа шықәсык иалагӡаны зыхәԥса аицҵалыҵ 1,5 млн. мааҭ рҟынӡа инаӡоз ахәшәқәа ылырҩааит. Иарбоу афакт ала апрокурортә гәаҭара мҩаԥгахоит.

«Ҳара ҭакԥхықәрала аусура азы аҳәара ҟаҳҵоит, аха рыцҳарас иҟалаз, аполиклиникақәа рҿы иаҳҳәо раҳауам. Ари даара идуу аԥаратә хархәагақәа роуп, урҭ рыла ауаҩы аҳәаанырцә дышьҭны ихәышәтәра ҟалоит. Аӡәырҩы Ереван ақалақь аҿы рыхәышәтәра азы иақәхарџьхон  300 нызықь мааҭ еиҵамкәа», – ҳәа инаҵшьны иазгәеиҭеит Емзар Ашуа.

Арецептқәа рылҩаара иадҳәалоу аҭагылазаашьа еиҳагьы иуадаҩхеит апандемиа аныҟала ашьҭахь. Усҟан аполиклиникақәа асиа иҭагалам ахәшәқәа рылҩаара азы азин рыҭан.

«Аха ас еиԥш азин зауз џьоукы-кьоукы уи цәгьашақә ахархәара иалагеит. Убри инамаданы ҳара агәабзиарахьчара Аминистрра ахь адырра ҟаҳҵеит ҳара Аԥсныфармациа аҿаԥхьа ауал ахьҳақәхаз инамаданы аполиклиникақәа асиа иҭагалам ахәшәқәа рылҩаара азин шрымам. Ҳара ари азҵаара ахылаԥшра ҳарӷәӷәеоит. Даҽакалагьы уаҳа ԥсыхәа ыҟаӡам, избан акәзар ус ҳхы мҩаԥаамгар ҳара ацхыраара ҵабыргыҵәҟьаны изҭаху ауаа ҳызрыцхрааӡом. Ҳазҭалаз ашықәс иалагӡаны ҳара ари азҵаара аҭыԥ иқәаҳҵоит хымԥада.  Хы-шықәса ирҭагӡоу Афонд аҿы ҳусура аамҭа иалагӡаны ҳара ахәшәқәа рыда уаҳа проблема ҳамаӡамызт. Ҳара есымша иарбоу апроблема ҳазцәырҵуеит», – ҳәа иазгәеиҭеит 1992-1993 шш. Аԥсны жәлар Рџьынџьтәылатәи еибашьра аинвалидцәа Рфонд ахантәаҩы ихаҭыԥуаҩ.

Уажәы иара убас аминистрцәа Реилазаара аҿы ишьақәырӷәӷәаз ахәшәқәа рсиа арҿыцра иазку аусура мҩаԥысуеит. Уи агәабзиарахьчара Аминистрра ауп иназыгӡо.