Аҟәа. Жәабранмза 2, 2022 шықәса. Аԥсныпресс. Аԥсны аԥыза-министр ихаҭыԥуаҩ, аекономика аминистр Кристина Озган напхгара зылҭо аделегациа Ареспублика Ҭаҭарсҭан аекономика Аминистрра ахылаԥшра аҵаҟа иҟоу аусдкылара адгылара аҭара иазку арегионалтә Фонд иаҭааит, ҳәа адырра ҟанаҵоит Ареспублика Ҭаҭарсҭан аекономика Аминистрра аофициалтә саит.
Аусуратә еиԥылара аҿы аҩганктәи аусеицура, адәныҟаекономикатә усура аҿиара, ареспубликақәа рҿы аус зуа анаплакқәа аимадара рыбжьаҵара, уҳәа ирыдҳәалоу азҵаарақәа жәпакы ирылацәажәеит.
Аиԥылара ааиртит Ареспублика Ҭаҭарсҭан аԥыза-министр ихаҭыԥуаҩ – аекономика аминистр Мидхат Шагиахметов. Уи аинвесторцәа рзы арегион иамоу афеидазаареи аекономикатә потенциали дрылацәажәеит, иара убас арезидентцәа рзы иҟоу азинҷыдақәа, иара убас анаплакқәа рынхамҩатә усура амониторинг азы аусура шеиҿкаау, насгьы иҟоу аҭагылазаашьақәа рҿы Ҭаҭарсҭан аекономика аҿиара шымҩаԥысуа, уҳәа дырзааҭгылеит.
Иара убас аҳәынҭқарратә ҿаҵа азы Агентра адиректор хада Иаков Геллер еизаз ирзеиҭеиҳәеит уаанӡа иаархәоз аҳәаанырцәтәи атауар амыцхәра ахарҭәаара азы Ареспубликатә маркетингтә Центр абазаҿы урыстәылатәи, ҭаҭарсҭантәи аҭыжьыҩцәеи аиқәыршәаҩцәагьы уахь иналаҵаны, зыдгалара мҩаԥырго аналагтә аалыҵ акаталог ҷыда шеиқәыршәоу иҳәеит. Иуникалу ареспубликатә ресурс аалыҵ ҭзыжьуа азауадқәа, ибжьаратәууи имаҷууи абизнеи ахаҭарнакцәа, уҳәа рзы ауааԥсыра рыҩныҵҟа еиҳа ахархәара зауа аалыҵ аҭыжьразы алшара рызҭо ажәалагалақәа алоуп.
Аиԥылара аҿы ибжьаратәууи имаҷууи абизнес асубиектқәа рзы апрограммақәеи, аинструментқәеи амаҵзурақәеи рынагӡара аганахьала иҟоу аԥышәа атәы еиҭарҳәеит аусдкылареи аконкуренциеи рыҿиаразы Адепартамент адиректор ихаҭыԥуаҩ Емиль Хисматови Ареспублика Ҭаҭарсҭан аусдкылара адгылара аҭара азы Афонд адиректор Салихов Аидар.
Аганқәа аусдкылара адгылара аҭара иазкны ҳаԥхьаҟа аусеицуразы еиқәшаҳаҭхеит.
