Аенергосистема аҿы иҟоу аҭагылазаашьа иадҳәаланы аграфик аиҭакрақәак алагалазар алшоит. Иара убасҵәҟьа астанциеиҵақәа рҿы асистемақәа мыцхәы рықәыӷәӷәарақәа цәырҵыр афымцамч аҿыхра ҟаларгьы ауеит.
17.Ажьырныҳәа.2023
АЖЬЫРНЫҲӘАМЗА 18 ИНАРКНЫ ЕГРЫТӘИ АӠФЫМЦА СТАНЦИА АҞЫНТӘИ ИААУА АФЫМЦАМЧ АЛА АИҚӘЫРШӘАРА АԤКРАҚӘА РАЛАГАЛАРА АГРАФИК ҾЫЦ АУСУРА ИАЛАГОИТ.
Аҟәа. Ажьырныҳәамза 17, 2023 шықәса. Аԥсныпресс. Ажьырныҳәамза 18 асааҭ 00:00 инаркны Егрытәи Аӡфымцатә Станциа аҟынтәи иаауа афымцамч ала аиқәыршәара аԥкрақәа ралагалара аграфик ҿыц аусура иалагоит.
«Ареспубликатә унитарнтә Наплакы «Амшынеиқәафымцамч» иҟанаҵо адыррақәа рыла, афымцамч аҭара аԥкра аамҭа уахынла ҩ-сааҭк аҟынтәи х-сааҭк рҟынӡа иацлоит. Уи зыхҟьо аӡеизакырҭа ахь аӡы алалара 30 куб. м/с рҟынтәи 27 куб. м/с. рҟынӡа иахьагхо ауп.
Урыстәылатәи Афедерациа аҟынтәи иаауа афымцамч аҭара аганахьала ажьырныҳәамза 12, 2023 шықәса инаркны иалагалаз аԥкра ԥсахрада иаанхоит.
