Аҟәа. Ԥхынкәынмза 28, 2022 шықәса. Аԥсныпресс. Ԥхынҷкәынмза 26, 2022 шықәса рзы Атәанчаҩратә фонд шықәсык азы акатегориақәа зегьы ирыҵанакуа атәанчаҩцәеи аԥаратә цхыраагӡатәқәа зауа ауааԥсыреи ашәатәқәа зегьы ршәара афинанстәра хнаркәшеит.
Атәачахәқәа, аԥаратә цхыраагӡатәқәа, ԥхынҷкәынмзазы ацҵақәа реицҵалыҵ 104 млн 994 нызықь мааҭи рҟынӡа инаӡеит.
Атәынчаҩратә фонд ахантәаҩы Денис Гәылариа иҟаиҵаз адыррақәа рыла, 2022 шықәса, ԥхынҷкәынмза 27 аҟынӡа атәачахәқәа, аԥаратә цхыраагӡатәқәа, ацҵақәа ршәара азы иазоужьхеит 1 млрд 279 млн 076,5 нызықь мааҭ, уи иҳаҩсыз ашықәс азы иҟаз аасҭа 76 млн 961,1 нызықь мааҭ рыла еиҳауп. 2021 шықәсазы аиԥш-зеиԥшу амҭахәҭа азы ишәан 1 млрд 202 млн 115,4 нызықь мааҭ.
«Ԥхынҷкәынмза 27, 2022 шықәса азы Атәанчаҩратә фонд ахь иалалаз абгаԥсатә лагалақәа рзеиԥш еицҵалыҵ 1 млрд 145 млн 312 нызықь мааҭ рҟынӡа инаӡоит, уи 2021 шықәса иаҿырԥшны уахәаԥшуазар, 148 млн 510 нызықь мааҭ рыла еиҳахеит. Ареспубликатә биуџьеҭ аҟынтәи адотациақәа 140 млн мааҭ рҟынӡа инаӡоит», - ҳәа иҳәеит Денис Гәылариа.
Атәанчаҩратә фонд ахантәаҩы иҳаҩсыз ашықәс иаҿырԥшны атәанчахәқәеи аԥаратә цхырагӡатәқәеи зауа рхыԥхьаӡара 2022 шықәсазы 1 011 – ҩык рыла еиҳахеит, иагьынаӡоит 49 528-ҩык рҟынӡа, ҳәа адырра ҟаиҵеит.
«Атәанчахәы ацҵа зауа рхыԥхьаӡара 11 845-ҩык рҟынӡа инаӡоит, уи 2021 шықәсазы иҟаз рхыԥхьаӡара асҭа 1 617 – ҩык рыла еиҳауп», - ҳәа иазгәеиҭеит Денис Гәылариа.
2022 шықәса алагара инаркны ԥхынҷкәынмза 27 аҟынӡа атәанчахәқәа рыцҵақәа рзеиԥш еицҵалыҵ 307 млн 837 нызықь мааҭи рҟынӡа инаӡон, уи 2021 шықәсазы иҟаз арбагақәа ирҿырԥшны уахәаԥшуазар, 99 млн 706 нызықь мааҭ рыла еиҳауп.
2021 шықәса аиԥш зеиԥшу аамҭахәҭа азы ишәан 208 131 нызықь мааҭ.
Денис Гәылариа ашәатәқәа рынагӡара аганахьала изеиԥшразаалак аиҵахарақәа ыҟаӡам ҳәа инаҵшьны иазгәеиҭеит.
«Ҳара иҟаз ашәатәқәа рганахьала иҟаз аиҵахарақәа зегьы наҳагӡеит. Ԥхынҷкәынмза 26 рзы ҳара иахыҳаԥхьаӡалеит атәанчахәқәеи ԥхынҷкәынмзазы аԥаратә цхыраагӡатәқәеи. Атәанчаҩратә фонд уалда иҿыцу 2023 шықәса иаԥылоит», - ҳәа иажәахә хыркәшо иҳәеит иара.
© АПСНЫПРЕСС
