Ауаажәларратә палата Амаӡаныҟәгаҩ, Аԥсны анацәа аҭынчреи асоциалтә қәнагеи рзы» аиҿкаара ахантәаҩы Гәули Кьычба ирыдылгалеит аорден аԥҵара, уи аибашьраҟны иҭахаз ранацәа иранашьахоит, иара убас аибашьра аветеранцәа рсоциалтә цхыраагӡақәа рышьҭыхра. 

«Ахадеи Хареи ҳаиқәшәеи, ҳажәалагалақәа иара иҟынӡа инаҳгеит. Иҭахаз ранацәа рзы аорден шьақәыргылазар ҳҭахуп», – лҳәеит Кьычба.

Аиубилеитә рыцхә иазку аусҩаԥгатәқәа информациала реиқәыршәара атәы лҳәеит ААТЕ адиректор хада Ирина Агрба. 

«2023 шықәса – ари иубилеитә шықәсоуп. Хықәкыс иҳамази ҳаззааизи азхәыцразы аҭагылазаашьа ҳауеит. Ҳтелехәаԥшраҟны иҟалоит адискуссиақәа, аишәа гьежьқәа. Архив ду ҳамоуп, аха уи системала еиҿкаатәуп, уи шьаҭас иаҭаны аусумҭа ҿыцқәа аԥҵатәуп. Сара аурыс журналистцәа иҟарҵаз сахәаԥшит. Рыцҳарас иҟоу, аибашьра иазку инеиҵыху адокументалтә фильм ҳамаӡам. Ас еиԥш иҟоу афильм аԥҵатәуп, ари аамҭа рацәаны иаҭахуп аҟнытә уажәнатә иалагатәуп. Иҳамоуп аматериал бзиа «Аибашьра анцоз». Ари ақырҭуа фашизм збаз, ианиаз ауааԥсыра ирбаз ираҳаз атәы иалацәажәоит. Ари аурысшәахьи, англыз бызшәахьи еиҭагазар ҳҭахуп. Ауаа ирдыруазароуп аибашьраҟны иҟаз, еиҳаракгьы, Аԥсны анҭыҵ инхо рзы, ари акраҵанакуеит. Акомиссиа ақәшаҳаҭхар, аусура иалагатәуп, аха уи азы аԥара аҭахуп. Ари ахааназы инхоит, ҭынхоуп», - лҳәеит лара.

«Абаза ТВ» Адиректор хада Руслан Ҳашыг иазгәеиҭеит Аиааира амш азгәаҭаразы аидеиақәа рацәоуп, еиуеиԥшым аамҭақәа рзы ирҳәахьазгьы налаҵаны. 

Руслан Ҳашыг иара убас иазгәеиҭеит аибашьра архив зымбац ауаа шырацәоу, уи ицифраркны идырбазар шыбзиоу.

АП «Амцахара» ахантәаҩы Лиосик Цыгәба иҳәеит «Аветеранцәа рзы» азакәан адкыларазы апартиа агәаанагара. «Аибашьратә хҭысқәа ирылахәыз ртәанчаратә қәра 5 шықәса ҳәа еиҵатәтәуп ҳәа иҳаԥхьаӡоит, аибашьра аинвалидцәа рзы аибашьратә ҳамҭақәа рыла ашәатәқәа шьақәыргылатәуп ҳәа, акоммуналтә маҵзурақәеи адгьыл азы ашәахтәқәеи рзы ашәатәқәа рышәагаа 2-тә еиҵатәтәуп ҳәа» - иҳәеит иара.

«Аибашьра аинвалидцәа 5-7 нызықь мааҭ роуеит, ас ҟалашьа амаӡам. Асоциалтә шәатәқәа шьҭыхтәуп. Арҭ ауаа Аиааира ҳзааргеит, урҭ рацәаҩӡам, абри рзыҟаҳҵароуп" - иҳәеит Галуст Трапизониан.

Леонид Лакербаиа иҳәеит аветеранцәа – аинвалидцәа рхыԥхьаӡара есааира ишагхо.  «Ус иҟоуп. Иҟаҳҵо заҳҭахуи аветеранцәа ҳзырмыцхрауаазар?» – иҳәеит иара.

Аԥсны аҭҵаарадыррақәа Ракадемиа Ахада Зураб Џьапуа иара убас  ААТЕ архив ацифракра дақәшаҳҭахеит. Акадмеиа аибашьра еиуеиԥшым аганқәа ирызкны аконференциа амҩаԥгара иазхәыцуеит.

Акомиссиа аилатәара хыркәшо, Ахада Ихаҭыԥуаҩ Бадра Гәынба иҳәеит: «Иахьа ара иҳәаз ажәалагалақәеи ахҳәаақәеи ҳасаб рзухоит, анализ ҟаҵахоит. Акомиссиа уажәоуп аусура ианалага. Сгәы иаанагоит азҵаарқәеи апроблемақәеи хшыҩзышьҭра рыҭахоит ҳәа. Ателехәаԥшра архив акәзар, хазы аилацәажәара мҩаԥгатәуп аспециалистцәа алархәны», –  иҳәеит Бадра Гәынба.