Аҟәа. Ԥхынҷкәынмза 23, 2022. Аԥсныпресс. Агәабзиарахьчара аминистр Едуард Быҭәба Ареспубликатә хәышәтәырҭа аҿы аиҭашьақәыргыларатә усурақәа рымҩаԥысшьа гәеиҭеит, ҳәа ианацҳауеит агәабзиарахьчара Аминистрра апресс-маҵзура.
Мышқәак рыԥхьа ахәышәтәырҭа аҿы ихыркәшахеит зхыԥхьаӡара акыр еиҳахаз акабинетқәа рҿы ҭеиҭыԥшлатәи аремонт. Уи аҟаҵара хықәкыс иамоу апациентцәа рчымазара ашьақәыргылареи амбулаториатә хәышәтәра рахгареи ахаҭабзиара ашьҭыхра ауп.
Иара убас, уи зусура ахаҭабзиара ҳараку аполиклиника ахәышәтәырҭа аҳақьымцәа русура армариареи астационартә хәышәтәра азона аҭаара армаҷреи алнаршоит.
Ареспубликатә хәышәтәырҭа аҿы акорпус афымцамч ала аиқәыршәара анеиԥҟьо азы автономтә дизельқәа ҩба ыҟоуп. Ахылаԥшырҭа аҿы ирыӡбеит инацҵаны агәҽанызаара аарԥшны агәабзиарахьчара Аминистрра ацхыраарала ахԥатәи адизель ашьақәыргылара. Уи еиҭаҵуа шьақәгылагахоит.
«Ҳара уи аплатформа иқәҳаргылоит, уи еиҭаҵуа адизель-генератор акәхоит. Ҳхәышәтәырҭақәак рҿы афымцамч ала аиқәыршәара еиԥҟьар, истандартәым аҭагылазаашьа шьақәгылар, ҳара ари агенератор наган иаҿаҳкуеит. Уи даара акыр зҵазкуа, ихымԥадатәиу усуп. Убри азы ауп ари адизель аиҭашьақәыргыларазы аԥарагьы зыԥшаахаз. Адизель зхаҭабзиара бзиоу еиқәыршәагоуп, уи ҭзыжьыз афирма Volvo ауп. Адизель-генераторқәа ҩба гылоуп, ахԥатәи адизель–генератор арезев аҳасабала Ареспубликатә хәышәтәырҭа мацара азы акәымкәа, егьырҭ атәыла амедицинатә усбарҭақәагьы рзы иргылахоит», - ҳәа иҳәеит Едуард Быҭәба.
