Адепутат иара убас аҳаирбаӷәаза атема дазааҭгылеит, уи аиҭашьақәыргылареи аус аруреи Аԥсныҟа иаауа атуристцәа рхыԥхьаӡара ацҵара иацхраауеит ҳәа иазгәеиҭеит.

Атуризм аминистр Ҭеимураз Хишба аиԥылара азы иҭабуп ҳәа иҳәеит.

«Аԥсни Урыстәылеи атуризм аусхкы аҿы русеицура уалацәажәозар, урҭ 150 шықәса рхыҵырц акгьы шагым азгәаҭатәуп. Асовет аамҭақәа раан Гагреи Пицундеи ркурортқәа актәи аҭыԥ аҿы игылан. Зегьы реиҳа аҳәынҭқарратә дачақәа асовет аамҭазы иахьыҟаз Аԥсны акәын. Уи иреиҳаӡоу амаҵурауаа рҳәынҭқарратә дачақәа ракәын, сара сгәаанагарала, уи машәыршақә иҟамлаӡеит», – ҳәа иҳәеит аминистр. 

Ҭеимураз Хишба иажәақәа рыла,  Аԥсны аиҳарак иаҭаауа урыстәылатәи атуристцәа роуп.

«Урыстәыла ҳара адгылара дуӡӡа ҳанаҭоит, ҳаргьы, жәаҳәарада, урыстәылатәи атуристцәа роуп аиҳарак ҳаззыԥшу. Аԥсны уаанӡа еиԥш уажәгьы асасцәа радыԥхьалара алшоит. Аԥсны зхаҭабзиара ҳараку аӡрыжәтә меигӡарах иҟоуп. Акастатә ҳаԥқәа рацәоуп, адунеи аҿы иҟоу зегь реиҳа иҵаулоу аҳаԥқәа 10 рҟынтәи 4 ҳаԥык Аԥсноуп иахьыҟоу. Аԥсны Амшын Еиқәа аԥшаҳәа иаҵанакуа атәылақәа зегьы рҿы аасҭа аҳауа ԥхоуп. Араҟа ҭоурыхла ишышьақәгылахьоу еиԥш, асасдкылара ҷыдала ахшыҩзышьҭра арҭоит, асас даара пату иқәырҵоит, уи ҳәарада атуризм аҿиара азы акырӡа аҵанакуеит», - ҳәа иҳәеит Ҭеимураз Хишба.

Аминистр Аҳәынҭқарратә Дума адепутатцәа ириҭаз адыррақәа рыла, 2021-тәи ашықәс аибашьрашьҭахьтәи Аԥсны иаҭааз атуристцәеи аԥсшьаҩцәеи рхыԥхьаӡара ала ипрецедентдоу шықәсны иҟалеит.

«Миллионки бжаки рҟынӡа ауаа аҭааит ҳреспублика, убри аан иазгәаҭатәуп, ҳтәыла аҿы инхо ауааԥсыра рхыԥхьаӡара   245 миллион ҩык рҟынӡа ишынаӡо», – ҳәа иазгәеиҭеит Ҭеимураз Хишба. 

2022-тәи ашықәс азы акәзар, аԥсабаратә ҭагылазаашьақәа (лаҵарамзеи рашәарамзеи ӡысаамҭаны иҟалеит) ирыхҟьаны, ҳреспублика иаҭааит  1 миллионк аҵкьыс маҷк еиҳаны аԥсшьаҩцәа. 

Аԥсни Урыстәылеи ирыбжьоу аҳәынҭқарратә ҳәаа атема дазааҭгыло, Аԥсны атуризм аминистр «Белорусиеи Урыстәылеи ирыбжьоу аҳәаа аиасра арежим акыр ирмариоуп, аха убри аамҭазы, Белоруссиеи Польшеи ирыбжьоу аҳәаа Белоруссиа аган ауп ахьчара назыгӡо, ҳара ҳҿы, Ԥсоугьы Егрыгьы урыстәылатәи аҳәаахьчаҩцәа гылоуп ҳәа иазгәеиҭеит.

«Аԥсныҟа азеиԥштәылуаҩратә урыстәылатәи атәылауаҩшәҟәы ала уаар алшоит, ҳара ҳҿы амааҭ ауп аус зуа, аурыс бызшәа аԥсуа бызшәа еиԥш аҳәынҭқарратә усбарҭақәа рҿы еиԥш егьырҭ аусбарҭақәа рҿы ахархәара амоуп. Ҳара есымша Урыстәылантәи асасцәа рбара гәахәарыла иҳадаҳкылоит», - ҳәа иҳәеит иара. 

Аԥсны аинвестициақәа ралагалара иаԥырхагоузеи ҳәа урыстәылатәи адепутатцәа иҟарҵаз азҵаара аҭак ҟаҵо, Ҭеимураз Хишба атәыла аҿы аинвестициақәа рзы иманшәалоу аклимат аԥҵоуп ҳәа иазгәеиҭеит.  

«Уи моу, аинвестор 70 млн. мааҭ иреиҳаны ианалеигало, уи ишәахтәқәҵара  50 процент рыла иагырхахоит, аинвестициа аҳасабала иалеигало аԥаратә хархәагақәа реицҵалыҵ еиҳазар, усҟан уи 8 шықәса рҟынӡа ашәахтәқәҵра аҟынтәи зынӡа ихы дақәаиҭхоит», – ҳәа адырра ҟаиҵеит иара.

«Џьоукы Аԥсны адгьыл аҭира азы азин аҟамзаара азҵаарақәа рацәаны ирызцәырнагоит, аха Урыстәыла уи еилкаарала иазнеиуеит ҳәа агәыӷра сымоуп.  Уи ҳҳәынҭқарра ахьчара иазку амеханизм акәны иҟоуп. Ҳара ҳтәыла даараӡа ихәыҷуп, уи ҳаиҷаҳауеит. Ҳара атәыла аҩныҵҟагьы адгьыл аҭира азин ҳамаӡам», – ҳәа инаҵшьны иазгәеиҭеит аминистр.

Аҵыхәтәнтәи ашықәсқәа рзы атуризм аусхкы аинвестициақәа ралагалара иааубаратәы иацлеит. Аобиект дуқәа рыргылара иалагеит, Аԥсны Мрагыларатәи ахәҭа аҿгьы уахь иналаҵаны. Алшықәсантәи аԥсшьара азы алшарақәа ирыцлеит.

Атуристцәа рхыԥхьаӡара иацлар, урҭ раанкыларҭа ҭыԥқәа азхартә иҟоума ҳәа азҵаара атуризм аминистр абас ала аҭак ҟаиҵеит:

«Асовет аамҭа азы Аԥсны иҟоу аԥшьарҭатә обиектқәа рӷьырак алшықәсанык аус руан. Иаагозар, аминералтә ӡқәеи аҳәынҵалахәышәтәреи назыгӡо гагратәи аӡылахәышәтәырҭа аӡынра иаднакылон 800-ҩык, аԥхынра  – 1500- ҩык рҟынӡа. Уажәы уи еиҭа аус ауеит. Очамчыра араион иахьаҵанакуагьы иҟоуп даара ибзиоу аобиектқәа. Алшықәсанык асасцәа рыдкылара ҳалшозҭгьы, мамзаргьы акурорттә аамҭахәҭа аҳәаақәа мызқәак рыла иаҳзырҭбаауазҭгьы, усҟан ҳара еиҳа ирацәаны ауаа ҳадаҳкыларын», – ҳәа иҳәеит иара.

Аҳаирбаӷәаза аганахьала Ҭеимураз Хишба аинвестор дыҟоуп, 2024 шықәса ахыркәшамҭазы Аԥсни Урыстәылеи рыбжьара авиаеимадара аиҭахацыркра азԥхьагәаҭоуп ҳәа иазгәеиҭеит.

«Аҟәатәи аҳаирбаӷәаза иуникалуп ҳәа уҳәар алшоит. Уи ахьыҟоу аҭыԥ Шәачатәи аҳаирбаӷәаза ахьыҟоу аҭыԥтә ҭагылазаашьа аасҭа акыр еиӷьуп. Аҟәатәи аҳаирбаӷәаза аҳаирпланқәа рыдкылара азы агеографиатәии аклиматтәии аҭагылазаашьақәа акыр иманшәалоуп», – ҳәа иазгәеиҭеит аминистр.

Аганқәа атуристтә усхкы иадҳәалоу егьырҭ азҵаарақәагьы ирылацәажәеит. Аиԥылара аиҩызаратә ҟазшьа аманы имҩаԥысит.